Tags-Travel

un ke hamrāh thā tamām safar
tai magar phir bhī rāsta na huā

vo kyā manzil jahāñ se rāste aage nikal jaa.eñ
so ab phir ik safar kā silsila karnā paḌegā

kitne rafīq-o-ham-safar jin kī milī na kuchh ḳhabar
kis ke qadam uThe kidhar kaun kahāñ pasar gayā

ḳhayāl aatā hai rah rah ke lauT jaane kā
safar se pahle hameñ apne ghar jalāne the

ham se kahtā thā ye nādīda zamīnoñ kā safar
kahīñ sahrā to kahīñ niilā samundar hogā

magar bahut der baad jā kar ḳhabar huī thī
vo mere hamrāh thā mirā ham-safar nahīñ thā

zindagī dard bhī davā bhī thī
ham-safar bhī gurez-pā bhī thī

āj-kal paidal safar dushvār hai
ḳhūbsūrat car kī bāteñ kareñ

qadmoñ meñ bhī takān thī ghar bhī qarīb thā
par kyā kareñ ki ab ke safar hī ajiib thā

ik safar tīrgī meñ jaarī hai
asp-e-shab par savār haiñ ham log

soch leñ aap mirā saath kahāñ tak deñge
marhale saikḌoñ daurān-e-safar aate haiñ

jinheñ ḳhayāl ho āñkhoñ kā lauT jaa.eñ vo
ab is ke ba.ad hukūmat safar meñ dhuul kī hai

thakan to agle safar ke liye bahāna thā
use to yuuñ bhī kisī aur samt jaanā thā

baḌh jā.egī ai ham-safaro dūrī-e-manzil
guzrī huī bātoñ ko na doharāo safar meñ

rahtā huuñ ujāloñ ke añdheroñ ke safar meñ
ye kis ne mujhe baañT diyā shām-o-sahar meñ

ik baat bahut ḳhaas thī chehroñ ke safar meñ
TuuTe hue aa.ine mile rāhguzar meñ

qaziya ho mausamoñ kā na din kā na raat kā
ab ke agar mile bhī to aisā safar mile

use DhūñDte the jo kū-ba-kū vo safar kī gard meñ aT ga.e
kise rāh-e-nik.hat-e-gul milī kise naqsh-e-pā-e-sabā milā

kise haal apnā sunā.eñ ham kise shauq apnā batā.eñ ham
koī ham-safar hai zamīn kā koī ham-rikāb-e-havā milā

maiñ phuul phuul safar kar rahī thī ḳhvāboñ kā
phuvār laa.ī thī tohfa na.e gulāboñ kā