Tags-Travel

sochtā huuñ to thakan aur bhī baḌh jaatī hai
phir mujhe izn-e-safar harf-e-mukarrar degā

safar pe jaise koī ghar se ho ke jaatā hai
har aabla mire andar se ho ke jaatā hai

jiine ke ishtiyāq se hai phir ramīdgī
phir sīna-e-hayāt meñ azm-e-safar haiñ ham

kaun hotā hai sharīk-e-safar-e-tanhā.ī
merā saaya hī mirā dushman-e-jānī niklā

mohabbatoñ kā safar is tarah bhī guzrā thā
shikasta-dil the musāfir shikasta-pā.ī na thī

vo ham-safar thā magar us se ham-navā.ī na thī
ki dhuup chhāñv kā aalam rahā judā.ī na thī

mukammal ho terā funūn-e-safar ye
haañ sāġhar se kah do duā bechte haiñ

jo rahbar kārvāñ ko manziloñ ke naam par luuTe
batā ai ham-safar achchhī nahīñ kyā gumrahī apnī

mohabbat ke safar meñ rut bhī aatī hai judā.ī kī
hameñ us vaqt koī bhī ḳhushī achchhī nahīñ lagtī

gulāboñ ke nasheman se mire mahbūb ke sar tak
safar lambā thā ḳhushbū kā magar aa hī ga.ī ghar tak

havā.eñ chup ḳhalā vīrāñ fazā ġhamgīñ safar mushkil
ravāñ hadd-e-nazar tak jabr ke lamhāt kā dariyā

hamāre azm kī shiddat agar samajhnī thī
to is safar meñ koī saḳht marhala laate

ḳhudā ke vāste ab to safar tamām karo
ki ab qafas se bhī to uñgliyāñ nikal aa.iiñ

hai rāh-e-jāñ yūñhī sunsān ek muddat se
na gard uḌī na dikhā.ī diye safar vaale

mohabbatoñ ke safīr ham haiñ judā hai tarz-e-safar hamārā
jahāñ bhī zikr-e-vafā milā hai vahāñ pe paiham Thahar ga.e haiñ

shāyad merī zamīn
apne safar ke āḳhirī paḌāv se aage nikal chukī hai

zindagī hai ki ufuq-tā-ba-ufuq
ik ghanī chup kā safar ho jaise

lagī to hai ye barābar mire ta.āqub meñ
gale havā ke kahīñ ye safar na paḌ jaa.e

thakan bahut thī magar sāya-e-shajar meñ 'jamāl'
maiñ baiThtā to mirā ham-safar chalā jaatā

ho gayā ab to ḳhayāloñ kā safar bhī dushvār
duur tak raah meñ hai ḳhud mirī shohrat kā ġhubār