Tags-Travel

jidhar pahuñchnā hai āġhāz bhī vahīñ se huā
safar samajhte haiñ is ko sazā nahīñ kahte

nuqūsh paañv ke likhte haiñ manzil-e-nā-yāft
mirā safar to hai tahrīr merī rāhoñ meñ

rashk qismat pe mirī saare zamāne ko rahe
ham-safar tum jo liye apne ye chhab ban jaao

kaTe to kaise ye andhī rifāqatoñ kā safar
na koī chehra na manzar dikhā.ī detā hai

chalo ki niilī fazāoñ meñ bādbāñ kholeñ
safar-navāz samundar dikhā.ī detā hai

aziyyatoñ ke safar meñ maiñ ne bharam rakhā phir bhī hausloñ kā
munāfiqat ke jahāñ meñ mujh ko sadāqatoñ kā nisāb likhnā

parā.e logoñ ne tai kar liyā safar merā
ki mere paañv se lipTā rahā hai ghar merā

tai kahāñ hotī hai rāh-e-safar-e-nā-ma.alūm
ġham hai yuuñ dīda-e-hairān ki jī jāntā hai

dostī rāste kī mat karnā
dil safar meñ mile nahīñ hote

haqīqatoñ ke safar meñ bahut akelī huuñ
majāz-e-ishq! zarā bāñkpan badalnā to

milā hai taḳht kise kaun taḳht par na rahā
ye baat aur hai jaarī thā jo safar na rahā

safar ik dūsre kā ek sā hai
badan manzil nahīñ hai marhala hai

yaar jab saath safar meñ ho kahāñ kī rozī
roz rozoñ hī meñ īd-e-ramzāñ kījiyegā

safar bhī jabr hai nā-chār karnā paḌtā hai
adū ko qāfila-sālār karnā paḌtā hai

zindagī kahtā huuñ maiñ jis ko zabāñ meñ apnī
vo safar merā sahī izn-e-safar terā hai

be-irāda jo uThe haiñ vo qadam mere haiñ
be-mahābā jo guzartā hai safar terā hai

safar pe yuuñ musir huuñ maiñ ki hausloñ meñ jaan hai
jo luT chukā yaqīn thā jo bach gayā gumān hai

abhī to pahle safar kī thakan hai paañv meñ
ki phir se juutī pe juutī mirī paḌī huī hai

ham dohrī aziyyat ke giraftār musāfir
paañv bhī haiñ shal shauq-e-safar bhī nahīñ jaatā

ik nayā hausla detī hai shikasta-pā.ī
paañv zaḳhmī hoñ to phir azm-e-safar jāgtā hai