Tags-Travel

is tarah manzil-e-ārzū kaT ga.ī is tarah ye ghanī tīrgī chhaT ga.ī
apne paañv pe yaaro ḳharāsheñ to kyā apne chehre pe gard-e-safar bhī na thī

rah-e-qarār ajab rāh-e-be-qarārī hai
ruke hue haiñ musāfir safar bhī jaarī hai

haañ dīda-e-tahqīq se ai zauq-e-safar dekh
rahbar jise samjhā hai vo rahzan to nahīñ hai

rāh-e-dard meñ koī ham-safar nahīñ hotā
apnī aag meñ ḳhud hī sham.a saañ pighalte haiñ

kaise kahūñ ki rut kī kaḌī rau se haar kar
jīvan ke is safar meñ tujhe maiñ ne kho diyā

maiñ to kal bhī thā safar meñ maiñ huuñ aaj bhī safar meñ
vahī daur merī manzil vahī merī jag-hañsā.ī

mirī zaat kā hayūlā tirī zaat kī ikaa.ī
koī ham-safar hai merā ki hai terī ḳhud-numā.ī

maqsūd ziyārat hai agar ka.aba-e-dil kī
ho garm-e-safar nāhiya-e-mulk-e-vatan meñ

ye ajab sā.at-e-ruḳhsat hai ki Dar lagtā hai
shahr kā shahr mujhe raḳht-e-safar lagtā hai

na zaat meñ koī manzil na kā.enāt meñ hai
safar karūñ to kahāñ koī merā jaada nahīñ

ab kū-e-sanam chaar qadam hī kā safar hai
kuchh aur masāfat ko Thahar kyuuñ nahīñ jaate

manzileñ bhī ye shikasta bāl-o-par bhī dekhnā
tum safar bhī dekhnā raḳht-e-safar bhī dekhnā

umr guzrī safar ke pahlū meñ
ḳhuub se ḳhūb-tar ke pahlū meñ

ab ḳhalāoñ ko sameTe har taraf hoñ gāmzan
aaj hai merā safar apne hī paikar kī taraf

pa jaise rail meñ do ajnabī musāfir hoñ
safar meñ saath rahe yuuñ to ham tumhāre bhī

bahut tavīl hai kaale samundaroñ kā safar
mujhe havā kī jagah bādbāñ meñ rakh denā

bichhaḌne vāloñ ko andāza hī nahīñ hotā
tū ham-safar hai magar ham-safar kahāñ tak hai

charāġh-e-yād kī lau ham-safar kahāñ tak hai
ye raushnī mirī dahlīz par kahāñ tak hai

maiñ pahuñchā apnī manzil tak magar āhista āhista
kiyā hai puurā ik mushkil safar āhista āhista

aa ke manzil pe so gayā raahī
ḳhatm hai bas yahīñ safar shāyad