Tags-Travel

is galī se us galī tak dauḌtā rahtā huuñ maiñ
raat utnī hī mayassar hai safar utnā hī hai

ham musāfir haiñ gard-e-safar haiñ magar ai shab-e-hijr ham koī bachche nahīñ
jo abhī āñ.suoñ meñ nahā kar ga.e aur abhī muskurāte palaT ā.eñge

kabhī hamāre liye bhī shāyad yahī kahā jā.egā kisī din
ki ham ne maġhrib kī samt gahre samundaroñ meñ safar kiyā thā

ek raat lagtī hai ik sahar banāne meñ
ham ne kyoñ nahīñ sochā ham-safar banāne meñ

ye umr-e-rā.egāñ ye safar ḳhvāb meñ kaTā
phir ye thakan ye paañv pe miTTī kahāñ se aa.ī

dil ko tire firāq kī aarzū yaad rah ga.ī
din vo mohabbatoñ ke bhī misl-e-rah-e-safar ga.e

ham hī the vo balā-kashāñ dār-o-rasan the jin kī jaañ
ham hī the shab ke ham-safar ham hī na apne ghar ga.e

kiyā thā ham ne safar saath saath yuuñ 'ālam'
ki maiñ akelā mirā ham-safar akelā thā

safar ke tasavvur se sahmā huā huuñ
baḌī der se yuuñ hī Thahrā huā huuñ

duniyā ko tabdīl karne ke haiñ is meñ ḳhvāb bas
inqilābī huuñ mirā raḳht-e-safar mat dekhiye

shah-rāh-e-raushnī pe chalā hai jo mere saath
tārīk rāstoñ meñ mirā ham-safar bhī ho

bulandī chhū ke aa.uuñ āsmāñ kī
parinda huuñ sadā mahv-e-safar huuñ

bas yūñhī tanhā rahūñgā is safar meñ umr bhar
jis taraf koī nahīñ jaatā udhar jaatā huuñ maiñ

na jaane kitne hī raste the muntazir lekin
simaT ke rah gayā qadmoñ meñ hī safar ab ke

maiñ thā sadiyoñ ke safar meñ 'ahmad'
aur sadiyoñ kā safar thā mujh meñ

ulajh ke rah ga.e kyā ham bhī kār-e-duniyā meñ
ki naubat-e-safar-e-zāt bhī nahīñ aa.ī

mujh ko bhī ye lamhoñ kā safar chaaT rahā hai
mil baañT ke ro leñ ai mire bhaa.ī idhar aa

ik be-hunar huuñ aur hunar chāhtī huuñ maiñ
ab dhuup ke safar meñ shajar chāhtī huuñ maiñ

jañgal meñ jañgaloñ kī tarah kā safar na thā
sūrat meñ aadmī kī koī jānvar na thā

ham ko ehsās hai sarāboñ kā
karte haiñ ret kā safar phir bhī