Tags-Travel

safar ḳhud-raftagī kā bhī ajab andāz thā
kahīñ par raah bhūle the na ruk kar dam liyā thā

safar meñ chain kahāñ daur-e-ābla-pā.ī
jo haal uThān pe thā ab vahī Dhalān pe hai

zamīñ nasīb kahāñ duur ke safar se use
vo ek dhuup kā TukḌā jo sā.ebān pe hai

umr vaise to safar meñ guzrī
likhne baiThe to ise ghar likkhā

vo hijratoñ ke udaas mausam
safar safar iztirāb sā kuchh

ik dasht-e-be-amāñ kā safar hai chale-chalo
rukne meñ jaan o dil kā zarar hai chale-chalo

umr-e-ravāñ kī manzileñ tūl-e-tavīl muḳhtasar
aap bhī ham-safar rahe ġhair bhī ham-ināñ gayā

phir rag-o-pai kī fazā hai bojhal
phir bagūloñ kā safar yaad aayā

haath meñ chāñd kī miTTī le kar
kitne firqoñ kā safar yaad aayā

kitnī sadiyoñ kī thakan hai jaañ par
ek lamhe kā safar yaad aayā

the unhī āñkhoñ meñ sapne kitne
apnā āġhāz-e-safar yaad aayā

maiñ vatan meñ aap safar kiyā jo qadam ko apnī nazar kiyā
milā apnā aap pata mujhe jahāñ ġhairiyat kā bayāñ nahīñ

thake thake se vo baazū vo fat.h-mand āñkheñ
safar tavīl koī bāl-o-par se guzrā thā

phir ek daaġh charāġh-e-safar banāte hue
nikal paḌe haiñ na.ī rah-guzar banāte hue

husūl-e-manzil-e-jānāñ se haath dho leñge
kuchh aur bojh jo pā-e-safar pe Daal diyā

qarīb o duur yahāñ ham-safar nahīñ koī
tirī talab ne ye kis rahguzar pe Daal diyā

na sazā-vār-e-hazar huuñ na mubārak hai safar
mere palle pe na sābit haiñ na sayyāre haiñ

go maiñ rah-e-hayāt meñ be-dast-o-pā huā
phir bhī muhīt-e-ishq meñ mahv-e-safar huuñ maiñ

manzil mirī safar hai mirā zād-e-rāh bhī
maiñ chal rahā huuñ aaj masāfat ke vāste

chalte rahnā to koī baat na thī
sirf samt-e-safar kā qissa hai