Tags-Travel

hameñ patā hai safar hai to dhuup bhī hogī
to ham ne peḌ ghanere uThā ke rakkhe haiñ

ye pāgal havā aur safar be-karāñ ye
judā sar se dastār ho kar rahegī

ab ke safar meñ dhuup kī dariyā-dilī na pūchh
aur sāya-e-shajar se mirā iḳhtilāf thā

ye umr bhar kā safar hai isī sahāre par
ki vo khaḌā hai abhī dūsre kināre par

chehre pe gard-e-rāh bhī baaqī nahīñ rahī
mujh se mirā subūt-e-safar kaun le gayā

umr bhar kā safar jis kā hāsil hai ik lamha-e-muḳhtasar
kis ne kyā kho diyā kis ne kyā pā liyā shahr vaalo suno

lā se lā kā safar thā to phir kis liye
har ḳham-e-rāh se jaañ ulajhtī rahī

rāh-e-talab simaT ke qadam chūmne lagī
jab bhī koī harīf-e-safar mil gayā hameñ

us gard se niklo ki safar kā kareñ āġhāz
yaaro tum abhī rāhguzar tak nahīñ pahuñche

milegā fā.eda kuchh ziist ke safar meñ mujhe
agarche is meñ hai adnesha-e-ziyāñ bhī bahut

vilāyat kā safar mushkil hai 'nāzim'
yahī hindostāñ hai aur maiñ huuñ

bajā ki darpai-e-āzār chashm-e-tar hai bahut
palaT ke ā.ūñgā maiñ garche ye safar hai bahut

safar the paañv meñ 'aslam' to manzileñ sar meñ
magar ab apnī hī parchhā.iyoñ se lipTe haiñ

ye safar vo hai kī jo chhūT gayā chhūT gayā
phir use paane kī tadbīr nahīñ kar sakte

ab gosh-bar-sadā hue ham dosto to kyā
āvāz duur kī thī samā.at-safar ga.ī

ek aisā bhī hai safar ki jahāñ
zindagī ham-safar nahīñ hotī

nigah buland suḳhan dil-navāz jaañ pur-soz
yahī hai raḳht-e-safar mīr-e-kārvāñ ke liye

ab le le mujh ko apnī hathelī kī oT meñ
merā sitāra burj-e-safar se nikal gayā

judā.iyāñ to muqaddar haiñ phir bhī jān-e-safar
kuchh aur duur zarā saath chal ke dekhte haiñ