Tags-Ummeed

haa.e vo husn-e-yaqīñ aah vo ummīd-e-karam
muntazir thā tirā bīmār sahar hone tak

sāda-lauhī mirī rakhtī thī tavaqqo.a tujh se
mujh se ummīd lagā.e tirī nādānī thī

un se hameñ nigāh-e-karam kī umiid kyā
āñkheñ nikāl leñ jo nazar se nazar mile

ai talḳhī-e-firāq ba-juz nāla-e-alam
paayā na kuchh bhī maiñ ne umīd-e-visāl meñ

naḳhl-e-ummīd meñ na phuul na phal
shajar-e-be-bahār sā hai kuchh

ġham hī ġham haiñ tirī ummīd meñ kyā rakkhā hai
iid aayā kare ab iid meñ kyā rakkhā hai

dard ke mausamoñ se kyā ummīd
sab balā.eñ haiñ āsmānī vahī

vo apnī zulf bikhrā kar tasavvur hī meñ aa jaate
ye saaya bhī uThā ab to mirī ummīd ke sar se

us se ham chhāñv kī ummīd bhalā kyā rakkheñ
dhuup detā hai hamesha ye shajar kaisā hai

samajh rahā thā ki nā-umīdī na parda-dār-e-umīd hogī
nazar uThā kar jo maiñ ne dekhā ġhubār thā kārvāñ se pahle

jā lagegī kashtī-e-dil sāhil-e-ummīd par
dīda-e-tar se agar dariyā ravāñ ho jā.egā

ḳhizāñ ke din kisī piile pahāḌ jaise din
shaguft gul tirī ummīd par guzārā kareñ

phir shāḳh-e-dil pe gul na.e ummīd ke khile
mausam bahār-e-tāza kā aayā hai barsoñ ba.ad

ummīd ne bhī yaas ke murdoñ ko pukārā
aa.ī koī āvāz na dil se na jigar se

gosh-e-ummīd hue jabki sadāoñ ke asiir
fat.h phir koh-e-nidā kā 'ziyā' karnā kaisā

dil se thī ummīd ḳhvāhish ke safar par saath de
par ye shāhīñ bhī shikasta-par nazar aayā mujhe

sā.at-e-shām kā darvāza pighal jā.egā
chashm-e-umnīd meñ vo sho.la-e-imkānī hai

ummīd-e-dil kī fitrat hai be-niyāz taskīñ
kam ho na be-qarārī aa.e agar yaqīñ bhī

kahte haiñ ki ummīd pe jiitā hai zamāna
vo kyā kare jis ko koī ummīd nahīñ ho