Tags-Ummeed

ab bāñjh zamīnoñ se ummīd bhī kyā rakhnā
ro.eñ bhī to lā-hāsil bo.eñ bhī to kyā kāTeñ

lafz-o-ma.anī meñ nahīñ rabt magar haa.e umiid
is pe baiThe haiñ ki vo Tālne vaalā bhī nahīñ

be-dilī vo hai ki marne kī tamannā bhī nahīñ
aur jī leñ kisī ummīd pe aisā bhī nahīñ

koī aahaT banātī hī nahīñ ummīd kā mausam
kuchh aisī chup lagī hai jaise goyā.ī safar meñ hai

daulat kī rakh na mār-e-sar-e-gañj se ummīd
muuzī vo degā kyā ki jo daulat-parast hai

ġhurūr-e-husn se koī umiid mat karnā
ḳhatā.eñ karnā to ḳhud hī muaaf ho jaanā

bahār-e-gulshan-e-ummīd bhī sairāb ho jaa.e
karam kī aarzū ai abr-e-rahmat ham bhī rakhte haiñ

tirī umiid tirā intizār jab se hai
na shab ko din se shikāyat na din ko shab se hai

ummīdvār-e-jāh na tālib hasham ke haiñ
ham bādshāh kishvar-e-ishq-e-sanam ke haiñ

pukārā jab bhī mujhe tum ne dasht-e-imkāñ se
koī umiid sī ubhrī sarāb kī sūrat

īmāñ nahīñ momin kā mukāfāt-e-amal par
ummīd-e-karam kyā tama-e-ḳhām nahīñ hai

pata hai ki vahāñ paanī nahīñ hai
magar ummīd sahrā chhāntī hai

un se ummīd-e-rū-numā.ī hai
kyā nigāhoñ kī maut aa.ī hai

ummīd-e-talattuf meñ ranjīda rahe donoñ
tū aur tirī mahfil maiñ aur mirī tanhā.ī

sar-e-tāq-e-tamannā bujh ga.ī hai sham-e-umīd
udāsī baḌh ga.ī hai be-dilī kam ho ga.ī hai

maiñ aur mujh ko va.ada-e-dīdār kī umiid
vo chāhtā huuñ aaj ki jo umr bhar na ho

sunā hai bujhte bujhte bhī tumhāre sard o murda lab se
ek sho.ala shola-e-yāqūt-fām o rañg o ummīd-e-faroġh-e-zindagī-āhañg lapkā thā

ḳhat jo tere naam likhā, takiye ke nīche rakhtā huuñ
jaane kis ummīd pe ye ta.avīz dabā ke rakhtā huuñ

khiltā nazar aatā hī nahīñ hai gul-e-umīd
jaatā hī nahīñ dil se ye dhaḌkā bhī ajab hai

habāb hai zindagī kā naqsha kahāñ kā din māh-o-sāl kaisā
havā hai ye dam kā kyā bharosa ummīd-e-fardā na kījiyegā