Tags-Urdu

hai urdu kā bhī lambā piir saaqī
banātī hai haram ko dair saaqī

dhaḌkanoñ kī zabān urdu hai
mere dil meñ kabhī samā ke to dekh

haañ mujhe urdu hai punjabi se bhī baḌh kar aziiz
shukr hai 'anvar' mirī socheñ ilāqā.ī nahīñ

tumhārī shā.irī par sar dhune haiñ
magar ye log urdu āshnā na.iiñ

merī ghuTTī meñ paḌī thī ho ke hal urdu zabāñ
jo bhī maiñ kahtā gayā husn-e-bayāñ bantā gayā

allāh us kā lahja-e-shīrīñ ki kyā kahūñ
vallāh us pe urdu zabāñ kī miThās aur

urdu ko ḳhud ḳhuun bahā kar joḌ rahe haiñ rishte log
'ġhālib'-o-'momin' 'munshī'-o-'mullā' 'chakbast'-o-'sīmāb' ke saath

merī gañg-o-jaman tahzīb kī duḳhtar hai ye urdu
ise muslim banāne kī ye sāzish aam hai saaqī

adab baḳhshā hai aisā rabt-e-alfāz-e-munāsib ne
do-zānū hai mirī tab-e-rasā tarkīb-e-urdu se

lipaT jaatā huuñ maañ se aur mausī muskurātī hai
maiñ urdu meñ ġhazal kahtā huuñ hindī muskurātī hai

tumhārī aañkh par aayā savāl urdu ke parche meñ
batāo lājavrdī arġhavānī kis ko kahte haiñ

agar terī ḳhushī hai tere bandoñ kī masarrat meñ
to ai mere ḳhudā terī ḳhushī se kuchh nahīñ hotā

nutq kā e.ajāz hai urdu zabāñ
vaqt kī āvāz hai urdu zabāñ

giitā aur qur.āñ kī tafsīreñ liye
maz.haboñ kā raaz hai urdu zabān

qaumī yak-jehtī se jo paidā huī
vo hasīñ āġhāz hai urdu zabāñ

mā.il-e-parvāz hai is kā adab
manzil-e-parvāz hai urdu zabāñ

sab zabānoñ par chaḌhī hai 'mauj' ye
is liye mumtāz hai urdu zabāñ

ye zabāñ ke saath hai tahzīb bhī
qābil-e-sad-nāz hai urdu zabāñ

is kā dushman dushman-e-amn-o-amāñ
prem kā andāz hai urdu zabāñ

jis meñ sur haiñ muḳhtalif bhāshāoñ ke
vo anokhā saaz hai urdu zabāñ