Tags-Violence

zulm-o-tashaddud ke shaidā.ī shāyad tujh ko ilm nahīñ
tere bhī sapne TūTeñge mere har ik ḳhvāb ke saath

tavānā ko bahāna chāhiye shāyad tashaddud kā
phir ik majbūr par shorīdgī kā ittihām aayā

magar haTe haiñ kahīñ jabr aur tashaddud miTe
vo falsafe ki jilā de ga.e dimāġhoñ ko

qitāl zulm-o-tashaddud fasād aag dhuāñ
hamāre shahr meñ ab kyā mazīd rakkhā hai

chāhtā huuñ maiñ tashaddud chhoḌnā
ḳhat hī likhte haiñ javābī log sab

tū āñdhiyoñ ke tashaddud kī baat kartā hai
maiñ apne TuuTe hue par talāsh kartā huuñ

matā-e-amn luTā.eñge ham zamāne meñ
nizām-e-jabr-o-tashaddud kuchal ke dam leñge

tavānā ko bahāna chāhiye shāyad tashaddud ko
phir ik majbūr par shorīdgī kā ittihām aayā

tamām jabr-o-tashaddud kī had bhī ḳhatm huī
ki jab se sabr ko mehvar banā diyā ham ne

aaj hai jabr-o-tashaddud kī hukūmat ham par
kal hamīñ beḳh-kun-e-qaisar-o-ḳhāqāñ hoñge

paḌhī jo jabr-o-tashaddud kī dāstān kahīñ
kabhī shu.ūr kabhī lā-shu.ūr kaañp uThā

ġham-e-dil kī zabāñ ahl-e-tashaddud kam samajhte haiñ
na dil ko dil samajhte haiñ na ġham ko ġham samajhte haiñ

kyā jāniye kyuuñ log tashaddud pe utar aa.e
dastār bachāte haiñ to sar TuuT rahā hai

kar na ThanDā sard-mehrī se mirā josh-e-talab
nāravā hai ye tashaddud nā-munāsib ye ġhazab

ye rañg-o-nasl aur tashaddud ke silsile
dushman kī rāhatoñ ke sivā aur kuchh nahīñ

ḳhilāf-e-hañgāma-e-tashaddud qadam jo ham ne baḌhā diye haiñ
baḌe baḌe bāniyān-e-jaur-o-sitam ke badhiye biThā diye haiñ

tum tashaddud ke ravādār nahīñ ho lekin
amn kī dil se himāyat bhī kahāñ kī tum ne