Tags-Wahshat

vahshat-e-ġham se raat bhar yaaro
royā maiñ phir huī sahar yaaro

jo hotā hai kisī se uns sab se vahshat aatī hai
mirī sahrā-nashīnī kā hai merā man-haran baa.is

uljhe ab panja-e-vahshat na garebānoñ se
aaj use sīna-a-a.adā meñ gaḌoyā jaa.e

mujh se un āñkhoñ ko vahshat hai magar mujh ko hai ishq
khelā kartā huuñ shikār āhū-e-sahrā.ī kā

ḳhauf-o-vahshat bar-sar-e-bāzār rakh jaatā hai kaun
yuuñ rag-e-ehsās par talvār rakh jaatā hai kaun

tū mire hisse kī vahshat kā maza letā hai
aur maiñ terī mashiyyat kā maza letā huuñ

jo koī ki hai dasht vahshat kā sākin use hosh ke shahriyoñ se hai nafrat
ye dīvāngī kā nipaT ḳhuub aalam hai zanjīr kī jā ulañgoñ meñ rahiye

dil meñ ḳhayālāt-e-rañgīñ guzarte haiñ jiyūñ boss phūloñ ke rañgoñ meñ rahiye
vahshat ke jañgal meñ kab lag pareshāñ ho ġham ke bhāroñ ke sañgoñ meñ rahiye

kāñch kī shāḳhoñ pe laTke terī vahshat ke samar
terī vahshat ke samar bhī ham ne paale shahr meñ

khule pinjre meñ bhī jis ko hai vahshat
ye dil aisā parinda kar liyā hai

josh-e-vahshat mere talvoñ ko ye iizā bhī sahī
haiñ jahāñ sau aable kuchh ḳhār-e-sahrā bhī sahī

zarā dekhnā ki vo kaun hai pas-e-ramz-e-vahshat-e-āshiqī
bhalā kis ne ham ko shikast dī kabhī pahle aisā huā nahīñ

qalb-e-'hāfiz' tā-dam-e-āḳhir na pā.egā sukūñ
jumla-sāmān-e-tarab-angez vahshat-ḳhez hai

'nūr' jaulāñ hai samand-e-vahshat
aaj tā-hadd-e-nazar jā.eñge ham

vahshat-e-dast-o-garebāñ na tujhe hai na mujhe
jur.at-e-dasht-o-bayābāñ na tujhe hai na mujhe

zikr-e-shab-e-firāq se vahshat use bhī thī
merī tarah kisī se mohabbat use bhī thī

chāhūñ ki hāl-e-vahshat-e-dil kuchh raqam karūñ
bhāgeñ hurūf vaqt-e-nigārish qalam se duur

vahshat se har suḳhan mirā goyā ġhazāla hai
bū se nasha ho ye vo mai-e-der-sālā hai

maqām-e-hosh-o-ḳhirad intiqām-e-vahshat hai
junūñ kī rāh-guzāroñ se khel saktā huuñ

idhar ye dil abhī tak hai asīr-e-vahshat-e-sahrā
udhar us aañkh ne chāroñ taraf pahra biThāyā hai