Tags-Azaab

rāhat-e-nazar bhī hai vo azāb-e-jāñ bhī hai
us se rabt-e-lazzat bhī aur imtihāñ bhī hai

azāb-e-jāñ qafas kī tañgiyāñ phir us pe ye turra
havāoñ par havā.eñ aa rahī haiñ sehn-e-gulshan se

bāteñ haiñ vā.izoñ kī azaab o savāb kyā
do din kī zindagī meñ hisāb-o-kitāb kyā

ab ḳhayāloñ meñ bhī nahīñ ho tum
ik mukammal azaab lagtī ho

shikast-e-jāñ se sivā bhī hai kār-e-fan kyā kyā
azaab khīñch rahā hai mirā badan kyā kyā

qadam qadam pe charāġhoñ kī saañs ruktī hai
ki ab to shahroñ meñ jiinā azaab lagtā hai

dekh kar aayā hai nāseh kyā jahannam kā azaab
haiñ faqat ye jāhiloñ kā dil Darāne ke liye

zindagī aur de azaab mujhe
mujh pe aa.ed lagān kuchh kam hai

aañkh ne phir azaab dekhā hai
ek taaza gulāb dekhā hai

kabhī haqīqat se khel lenā kabhī ulajhnā majāz se tum
kabhī kisī se karam kī ḳhvāhish kabhī kisī se azaab likhnā

gila tire firāq kā jo āj-kal nahīñ rahā
to kyuuñ bhalā ye mustaqil azaab Tal nahīñ rahā

ḳhvāb sā kuchh ḳhayāl hai lekin
jaan par ik azaab rahtā hai

azāb-e-āḳhirat kī baat aage
itāb-e-zindagī se Dar rahā huuñ

ye sochtā huuñ ki bedāriyoñ meñ ālam-e-ḳhvāb
azaab hai nafas-e-ātish-āshnā kā azaab

koī azāb-e-jahannam meñ mubtalā ho jaa.e
uruuj pā ke zamīñ par gire ḳhudā na kare

bahut ghuTan hai bahut iztirāb hai maulā
hamāre sar pe ye kaisā azaab hai maulā

kisī ko bhej ke ḳhat haa.e ye kaisā azaab aayā
ki har ik pūchhtā hai nāma-bar aayā javāb aayā

ai shab-e-furqat na kar mujh par azaab
maiñ ne terā muñh nahīñ kaalā kiyā

milā jo mauqa.a to rok dūñgā 'jalāl' roz-e-hisāb terā
paḌhūñgā rahmat kā vo qasīda ki hañs paḌegā azaab terā

hamārī ruuh pe jab bhī azaab utreñge
tumhārī yaad ko is dil ko Dhaal honā hai