Tags-Waqt

pukārtī haiñ mire dil kī pastiyāñ mujh ko
yahī to vaqt hai rutba buland rakhne kā

vaqt jab raah kī dīvār huā
koī sailāb numūdār huā

muflisī laakh sahī ham meñ vo ḳhuddārī hai
hākim-e-vaqt kī ḳhidmat nahīñ karne vaale

jis vaqt shahr ne ye ḳhat likhnā shurūa kiyā
shāyad vo ro rahā thā

ek sukūt thā tārīkī thī vaqt kī Thahrī saañs
miTTī ne bārish dekhī thī peḌ ne dekhe ḳhvāb

badal diiñ inqilāb-e-vaqt ne qadreñ zamāne kī
sajāte the jo ḳhud mahfil vo ab mahfil ko rote haiñ

use maiñ hī jānūñ huuñ dostoñ kisū vaqt apnā bhī yaar thā
kabhū mom thā kabhū sañg thā kabhū phuul thā kabhū ḳhaar thā

ye to vaqt vaqt kī baat hai hameñ un se koī gila nahīñ
vo hoñ aaj ham se ḳhafā ḳhafā kabhū ham se un ko bhī pyaar thā

vaqt ik din badal ke rakh degā
us kī har ek chaal mat pūchho

ḳhudā vo vaqt na laa.e ki sogvār ho tū
sakūñ kī niiñd tujhe bhī harām ho jaa.e

inqilāb-e-vaqt kā parcham thā mere haath meñ
zīnat-e-dār-o-rasan to merā sar honā hī thā

ḳhushī ke vaqt bhī tujh ko malāl kaisā hai
urūj-e-husn meñ naqs-e-kamāl kaisā hai

vaqt kī dhuul ne kajlā diye sūraj kitne
kaise kaisoñ ko zamāne ne farāmosh kiyā

vaqt ke hāthoñ ne jab tak ki na ḳhāmosh kiyā
maiñ ne tujh ko na kisī lamha farāmosh kiyā

fursat is vaqt ġhanīmat hai nikal zulmat se
suljh kar zulf se ruḳhsār-e-daraḳhshān meñ aa

ḳhauf ġhammāz raqīboñ kā na kar kuchh hargiz
ho ke raazī ba-razā vaqt hai maidān meñ aa

merī jaañ vo bāda-ḳhvārī yaad hai
vaqt-e-mastī girya-zārī yaad hai

gharoñ meñ vaqt-guzārī kā ab hai shuġhl hī kyā
yahī ki guftugū-e-hādsāt kī jaa.e

dil pe kuchh aisā vaqt paḌā hai
bhāge lekin raah na paa.e

har falsafe ko vaqt ne aise miTā diyā
jaise koī nuqūsh miTā de saleT ke