Tags-Waqt

vaa.e qismat kahe jab sabr sā mūnis ye baat
tujh pe dekhūñgā burā vaqt to Tal jā.ūñgā

ḳhulūs kī na chalī ek bhī yahāñ 'ashraf'
gañvāyā vaqt abas ham ne iltijāoñ meñ

hamāre hāthoñ se jab vaqt kī girah na khulī
to log samjhe ki ham ḳhush haiñ ibtilāoñ meñ

dast-e-qudrat ko naaz hai ham par
vaqt ke shāhkār haiñ ham log

saa.e jhulas ke rah ga.e vaqt kī tez dhuup meñ
merā bhī rañg uḌ gayā terā bhī ruup Dhal gayā

jo rāste meñ mile koī masjid-e-vīrāñ
to ham vahīñ kahīñ vaqt-e-azāñ mileñge tumheñ

tamannā maut kī radd ho ga.ī hai vaqt ke Dar se
agar maiñ zindagī māñgūñ mujhe jiine nahīñ detā

peshāniyoñ pe vaqt shikan-dar-shikan nahīñ
chehra-ba-chehra likhe hue dil ke dard haiñ

tamām jism hī āñkheñ kiye hai vo apnā
maiñ ek vaqt ka.ī ā.inoñ meñ rahtā huuñ

vaqt ruk ruk ke jinheñ dekhtā rahtā hai 'salīm'
ye kabhī vaqt kī raftār huā karte the

vaqt-e-vahshat mujhe pahchān nahīñ paatā koī
phir batātā huuñ fulāñ shaḳhs kā beTā huuñ maiñ

dil ko jis vaqt ye jin aan ke lipTā phir to
kyā kareñ vaañ vo jo likhte haiñ falītā ta.avīz

koī aise vaqt meñ ham se bichhḌā hai
shaam Dhale jab panchhī ghar lauT aate haiñ

arsa-e-ḳhvāb se vaqt maujūd ke rāste meñ gañvā dī ga.ī guftugū
ek isrār kī bebasī rah ga.ī ek inkār kā bāñkpan rah gayā

duniyā meñ burā vaqt to aatā hai sabhī par
ab ḳhud hī bure vaqt se do-chār hai duniyā

abhī ik dūsre ko dekh leñ donoñ nazar bhar ke
bichhaḌne kā hai vaqt aayā ye qurbat phir kahāñ hogī

koī ḳhabar nahīñ kis vaqt aur kahāñ gir jaa.e
ḳhudā ke haath se jām-e-sifāl duniyā kā

tum to kahte the ḳhudā tum se ḳhafā hai 'qaisar'
Dūbte vaqt vo jo ik haath baḌhā thā kyā thā

maiñ jaise vaqt ke hāthoñ meñ ik ḳhazāna thā
kisī ne kho diyā mujh ko kisī ne paayā mujhe

hai daur-e-falak zo.af meñ pesh-e-nazar apne
kis vaqt ham uThte haiñ ki chakkar nahīñ aatā