Tags-Waqt

ye nā-guzīr hai ummīd kī numū ke liye
guzartā vaqt kahīñ tham gayā to kyā hogā

minnat-e-gosh nahīñ qāfila-e-vaqt-e-'sahar'
lamha lamha vo magar bāñg-e-darā māñge hai

ik aisā vaqt bhī sahrā meñ aane vaalā hai
ki rāsta yahāñ dariyā banāne vaalā hai

hazāroñ saal chalne ki sazā hai
batā ai vaqt terā jurm kyā hai

phūloñ ne hañs ke Taal diyā vaqt par hameñ
kāñTā magar bahār ke hālāt kah gayā

vaqt bahut hai hamāre paas
vaqt guzārī ke liye

Dar rahā huuñ ki sar-e-shām tirī āñkhoñ meñ
maiñ ne jo vaqt guzārā hai koī dekh na le

vaqt ke saare sitam ham ne sahe mil kar to phir
chāñd mere saath āḳhir kyuuñ nahīñ būḌhā huā

jis vaqt bhī mauzūñ sī koī baat huī hai
māhaul se naġhmāt kī barsāt huī hai

vo vaqt bhī ḳhudā na dikhā.e kabhī mujhe
un kī nadāmatoñ pe ho sharmindagī mujhe

vaqt kī baat hai alag jānāñ
husn sauġhāt hai alag jānāñ

rūThnā thā kise manānā thā
vaqt ke saath gungunānā thā

ab chāhiye aisī fikr tujhe jis se ki nazāre kī Thahre
har vaqt ke rone se hāsil ai dīda-e-tar kuchh bhī na huā

sukūt-e-shab ke tasalsul meñ kho ga.ī chup-chāp
jo yaad vaqt ke mehvar pe ghuum saktī thī

vaqt kī chaap se gūñjī hai mirī tanhā.ī
vaqt kī chaap ko ab aur garāñ kaun kare

ham ne maanā ki baḌī chiiz hai pābandī-vaqt
sajda-e-shauq ko pāband-e-azāñ kaun kare

vaqt be-vaqt kā āzār milā
vaqt ko saath lagā lene se

zarūr vaqt hī kuchh chaal chal rahā hogā
vahī bisāt pe mohre badal rahā hogā

dekhne merī pazīrā.ī ko ab aatā hai kaun
lamha bhar ko vaqt kī dahlīz par aayā huuñ maiñ

dikhā.ī dete haiñ dhuñd meñ jaise saa.e koī
magar bulāne se vaqt lauTe na aa.e koī