Tags-Waqt

raakh kahtī thī 'sham.a' kī uḌ kar
haa.e vaqt-e-sahar gayā koī

jalāl ko bhī vaqt ne samo diyā hai sher meñ
ġhazal kā matmah-e-nazar jamāl hī nahīñ rahā

vaqt-e-āḳhir khulā hai ye uqda
bholī sūrat bhī be-zarar na huī

qadam qadam pe sazā de rahā hai vaqt hameñ
hamāre aib udū ke hunar banāte hue

ruteñ badaltī haiñ vaqt ek sā nahīñ rahtā
tamām umr na bedār baḳht rahte haiñ

ham aaj bahut hī pareshāñ haiñ is vaqt ke pher se hairāñ haiñ
hameñ le ke chalo kisī aisī taraf jahāñ hijr o visāl nahīñ hotā

dhuup aur chhāñv musallam magar apnī had meñ
vaqt pāband nahīñ hai ki Thahar jā.egā

arz-e-tishna pe baras abr-e-ravāñ khul ke baras
baat rah jā.egī ye vaqt guzar jā.egā

vaqt kahāñ rukā bhalā par ye kise gumān thā
umr kī zad meñ aa.egā tujh sā parī-jamāl bhī

adl se kar saltanat ai dil tū tan ke mulk meñ
vaqt-e-fursat buujh le ye hukmarānī phir kahāñ

vaqt kī āñkhoñ meñ dekhī kaalī ghanghor ghaTā
lekin gaz bhar chhāñv nahīñ thī jab maiñ paar gayā

jitnā barham vaqt thā utne hī ḳhud-sar ham bhī the
mauj-e-tūfāñ thā agar pal pal to patthar ham bhī the

to DhūñDh hameñ vaqt kī dīvār ke us paar
ham duur bahut duur kī manzil kā nishāñ haiñ

tum ne sab kuchh kiyā insān kī izzat nahīñ kī
kyā huā vaqt ne jo tum se ri.āyat nahīñ kī

ik saal gayā, ik saal nayā hai aane ko
par vaqt kī bhī ab hosh nahīñ dīvāne ko

gūñjtā hai mire siine ke nihāñ-ḳhāne meñ
saañs letā hai koī vaqt kī raftār ke saath

ek nisbat ek rishta ek hī ghar ke makīñ
vaqt ne donoñ meñ lekin fāsla rahne diyā

dekhiye vaqt kis tarah guzrā
ḳhud ke shīshe ke rū-ba-rū kiije

vaqt shāhid hai ki har daur meñ iisā kī tarah
ham salīboñ pe liye apnī sadāqat aa.e

ek ik lamha jalā kar ḳhud ko tere hijr meñ
vaqt kaise māpte haiñ ye diye kī lau se pūchh