Tags-Yaad

sab ko ham bhuul ga.e josh-e-junūñ meñ lekin
ik tirī yaad thī aisī jo bhulā.ī na ga.ī

be-niyāzī bhī ek ne.amat thī
yaad karte hī bhuul jaate the

hue mujh se jis ghaḌī tum judā tumheñ yaad ho ki na yaad ho
mirī har nazar thī ik iltijā tumheñ yaad ho ki na yaad ho

vo tumhārā kahnā ki jā.eñge agar aa sake to phir ā.eñge
use ik zamāna guzar gayā tumheñ yaad ho ki na yaad ho

mirī be-qarāriyāñ dekh kar mujhe tum ne dī thiiñ tasalliyāñ
mirā chehra phir bhī udaas thā tumheñ yaad ho ki na yaad ho

mirī bebasī ne zabān tak jise lā ke tum ko rulā diyā
mire TuuTe saaz kī vo sadā tumheñ yaad ho ki na yaad ho

tumheñ chand qatra-e-ashk bhī kiye pesh jis ke javāb meñ
vo salām nīchī nigāh kā tumheñ yaad ho ki na yaad ho

mire shāne par yahī zulf thī jo hai aaj mujh se khiñchī khiñchī
mire haath meñ yahī haath thā tumheñ yaad ho ki na yaad ho

kabhī haath meñ jo sharāb lī vahīñ tum ne chhīn ke pheñk dī
mujhe yaad hai mire pārsā tumheñ yaad ho ki na yaad ho

kahīñ tum ko jaanā huā agar na ga.e baġhair 'nazīr' ke
vo zamāna apne 'nazīr' kā tumheñ yaad ho ki na yaad ho

dil meñ yād-e-raftagāñ ābād hai
varna ye dil bhī kahāñ ābād hai

pakkī saḌkoñ pe yaad aatā hai
kachche rastoñ kā sabza-e-pāmāl

kitne hī fasāne yaad aa.e kitne hī sahāre yaad aa.e
tūfān ne bāñheñ phailā diiñ jis vaqt kināre yaad aa.e

dīvār se lag kar sochoñ kī ummīd kā saarā din guzrā
jab raat huī to ham ko bhī sab ḳhvāb hamāre yaad aa.e

paimān-e-vafā ke siine se phir aaj lahū Tapkā 'jāmī'
jo raah meñ thak kar baiTh ga.e ahbāb vo saare yaad aa.e

tumhī ko yaad na kartā to aur kyā kartā
tumhāre ba.ad sabhī ne bhulā diyā hai mujhe

aaj ā.īne meñ ḳhud ko dekh kar yaad aa gayā
ek muddat ho ga.ī jis shaḳhs ko dekhe hue

ab to ye bhī yaad nahīñ ki mohabbat meñ
kab se tere paas huuñ aur kitnā huuñ maiñ

mujhe bhī apnā dil-e-rafta yaad aatā hai
kabhī kabhī kisī bāzār se guzarte hue

ye kis kī yaad hai jo mere dil meñ
musalle se bichhātī jā rahī hai