Tags-Yaad

kab mujhe yaad ruḳh o zulf-e-siyah-fām nahīñ
koī shaġhl is ke sivā sub.h se tā shaam nahīñ

dhuup zālim hī sahī jism tavānā hai abhī
yaad aa.egā kabhī sāya-e-ashjār mujhe

ab duur talak yaad kā sahrā hai nazar meñ
kuchh roz to rahnā hai isī rāhguzar meñ

bah ga.e āñsuoñ ke dariyā meñ
aap kī baat yaad hī na rahī

maiñ ne ḳhud meñ terī yaad sajā.ī hai
jab bhī tū ne tanhā chhoḌā kūza-gar

aap kī yaad bhī aa jaatī hai
itnī mahrūm nahīñ bazm-e-ḳhayāl

yūñhī har shaam agar aap ko ham yaad raheñ
sohbateñ garm raheñ mahfileñ ābād raheñ

hai ajab haal ye zamāne kā
yaad bhī taur hai bhulāne kā

hasīn rātoñ jamīl tāroñ kī yaad sī rah ga.ī hai baaqī
kuchh apnī ujḌī huī bahāroñ kī yaad sī rah ga.ī hai baaqī

har ek mahfil paḌī hai suunī tamām mele bichhaḌ chuke haiñ
sitamgaroñ kī sitam-shi.āroñ kī yaad sī rah ga.ī hai baaqī

ġham-e-vafā kahne sunñe vaale kahāñ ga.e ahl-e-dil na jaane
tumhārī ulfat ke rāz-dāroñ kī yaad sī rah ga.ī hai baaqī

vo shaam se aarzū sahar kī vo be-kalī raat raat bhar kī
un āshnā āshnā sitāroñ kī yaad sī rah ga.ī hai baaqī

udhar bhī ahd-e-vafā ke TukḌe khaTak ke pahlū meñ so chuke haiñ
yahāñ bhī TuuTe hue sahāroñ kī yaad sī rah ga.ī hai baaqī

gilā nahīñ 'saif' be-kasī kā kisī kā ġham kaun pūchhtā hai
yahī bahut hai ki ġham-gusāroñ kī yaad sī rah ga.ī hai baaqī

dil se us kī yaad ko ruḳhsat karo
taaki aa.e zindagī tartīb meñ

thī tirī yaad bhī kyā anjuman-ārā-e-ḳhayāl
dil meñ jo sho.ala uThā sham-e-shabistāñ samjhā

hijr ke sadme us kā taġhāful bāteñ haiñ sab kahne kī
kuchh bhī na mujh ko yaad rahegā jab vo gale lag jā.egā

vāsta koī na rakh kar bhī sitam Dhāte ho tum
dil taḌap uThtā hai ab kaahe ko yaad aate ho tum

chāñd meñ rañgat tumhārī phuul bhī tum se base
khīñchtī haiñ dil fazā.eñ yaad aa jaate ho tum

shahr-e-butāñ hai 'ātish' allāh ko karo yaad
kis ko pukārte ho hazrat nahīñ hai koī