Tags-Yaad

karoge yaad tum guzre zamānoñ kī sabhī bāteñ
kabhī itrā ke hañs doge kabhī aañsū bahāoge

ai yād-e-yār dekh ki bā-vasf-e-ranj-e-hijr
masrūr haiñ tirī ḳhalish-e-nā-tavāñ se ham

kisī kī yaad kā aalam na pūchhiye mujh se
kabhī qarār hai dil ko kabhī qarār nahīñ

yuuñ shab-e-vasl kā hai aalam yaad
jaise barsoñ kī yaad ḳhvāb rahe

hāl-e-dil sun ke bol uThā qāsid
yaad kis ko ye sab kitāb rahe

haa.e vo din ḳhudā na laa.e yaad
ham se rūThe jo kuchh janāb rahe

bahr-e-hastī se kuuch hai darpesh
yaad mansūba-e-hubāb rahe

hichkiyoñ se yahī andāza lagāyā ham ne
yaad koī to dil-o-jān se kartā hogā

us ke ashkoñ kā gunāhgār maiñ ho jā.ūñgā
vo mujhe yaad agar kar ke sisaktā hogā

yaad hoñgī use bhūlī huī qasmeñ 'zākir'
vo mire zikr pe chup-chāp Thahartā hogā

hamārā alamiya ye thā ki ham-safar bhī hameñ
vahī mile jo bahut yaad aane vaale the

tirī yaad ho aur dil-e-bedam ho tirā dard ho aur dil-e-bedam ho
'bedam' ko rahe tire ġham se ġharaz tire ġham ko rahe 'bedam' se ġharaz

bahāroñ ko chaman yaad aa gayā hai
mujhe vo gul-badan yaad aa gayā hai

lachaktī shāḳh ne jab sar uThāyā
kisī kā bāñkpan yaad aa gayā hai

mirī ḳhāmoshiyoñ par hañsne vaalo
mujhe vo kam-suḳhan yaad aa gayā hai

tumheñ mil kar to ai yazdāñ-parasto
ġhurūr-e-ahraman yaad aa gayā hai

tirī sūrat ko jab dekhā hai maiñ ne
urūj-e-fikr-o-fan yaad aa gayā hai

kisī kā ḳhūb-sūrat sher sun kar
tirā lutf-e-suḳhan yaad aa gayā hai

mile vo ajnabī ban kar to 'rif.at'
zamāne kā chalan yaad aa gayā hai

ai charḳh-e-pīr dekh liiñ aThkheliyāñ tirī
yaad aa ga.e hameñ bhī zamāne shabāb ke