Tags-Yaad

zindagī kā hai ḳhulāsa vahī ik lamha-e-shauq
jo tirī yaad meñ ai jān-e-jahāñ guzrā hai

bazm-e-doshīñ ko karo yaad ki is kā har rind
raunaq-e-bār-gah-e-pīr-e-muġhāñ guzrā hai

apnī rūdād mujh ko yaad nahīñ
dil ko lekin tamām azbar hai

ḳhudā kī yaad meñ duniyā ko bhuul jā ai dil
vo kaam kar ki har ik tarf sūd-mand rahe

kis kī yaad kā dariyā mere dil se ho kar bahtā hai
kis ke dard pighal kar merī āñkhoñ meñ aa jaate haiñ

kis kī yaad kī ḳhushbū se maiñ din-bhar mahkā rahtā huuñ
kis ke ḳhvāb sañvar kar merī āñkhoñ meñ aa jaate haiñ

yaad paḌtā to nahīñ kab mirā dekhā huā hai
aisā lagtā hai ki ye sab mirā dekhā huā hai

us kā ḳhayāl us kā tasavvur usī kī yaad
koī nahīñ nazar meñ vo jab se nazar meñ hai

bas-ki guzishtanī hai vaqt bas-ki shikastanī hai dil
ḳhvāb koī dikhā ki jo yaad na aa sake mujhe

yād-e-chashm-e-surmagīñ meñ shab ko gar aatī hai niiñd
sūrat-e-murġh-e-nigah āñkhoñ se uḌ jaatī hai niiñd

shāyad tumhārī yaad mire paas aa ga.ī
yā hai mire hī dil kī sadā sochnā paḌā

kahāñ pe TuuTā thā rabt-e-kalām yaad nahīñ
hayāt duur talak ham se ham-kalām aa.ī

qadd-e-mauzūñ kā shajar yaad aayā
aur phir us kā samar yaad aayā

phir election kā hai sar meñ saudā
phir unheñ laḳht-e-jigar yaad aayā

chāñd par jaane kā muzhda sun kar
apnā bhūlā huā ghar yaad aayā

Thiik chaurāhe pe maiñ jā baiThā
jab tirā vaqt-e-safar yaad aayā

raah meñ mujh ko vo tanhā jo mile
jaane kyuuñ un kā pidar yaad aayā

dekh kar merī shikasta chappal
un ko 'hāshim' mirā sar yaad aayā

yaad aate haiñ mo.ajaze apne
aur us ke badan kā jaadū bhī

zinda rahne kā vo afsūn-e-ajab yaad nahīñ
maiñ vo insāñ huuñ jise nām-o-nasab yaad nahīñ