Tags-Yaad

zindagī kā kyā hasīñ anjām hai
dil meñ terī yaad lab par naam hai

ruuh par ik kaif ban kar chhā ga.ī
yaad se mahkī huī jo shaam hai

ujlī ujlī ḳhvāhishoñ par niiñd kī chādar na Daal
yaad ke rauzan se kuchh taaza havā bhī aa.egī

saare qur.ān se us parī-rū ko
yaad ik lafz-e-lan-tarānī hai

udaas rātoñ meñ tez coffē kī talḳhiyoñ meñ
vo kuchh ziyāda hī yaad aatā hai sardiyoñ meñ

ab tujhe merā naam yaad nahīñ
jab ki terā patā rahā huuñ maiñ

guzar ga.ī jo mauj us kī yaad hī fuzūl hai
magar ho us kā muḌ ke mujh ko baar baar dekhnā

oḌh luuñ us kī yaad kī chādar
aur ḳhud par nisār ho jā.ūñ

ma.azarat chāhte haiñ milne se
yaad aayā huā hai aaj koī

mujhe yaad aa rahī hai 'mus.hafī' kī
ġhazab the 'mīr' bhī maġhfūr baabā

maiñ tirī yaad ke saa.e meñ basar kartā rahā
is ḳharābe meñ koī aur shajar thā hī nahīñ

dard kī dhuup nahīñ yaad kā saaya bhī nahīñ
ab to qismat merī be-rañgī-e-hālāt huī

na raftagāñ haiñ na ab yād-e-raftagāñ baaqī
maiñ kyā huuñ juz ram-e-yak-mauja-e-fanā ki maiñ huuñ

namāz kaisī kahāñ kā roza abhī maiñ shaġhl-e-sharāb meñ huuñ
ḳhudā kī yaad aa.e kis tarah se butoñ ke qahr-o-itāb meñ huuñ

jo aaj zikr chalā āstīñ ke sāñpoñ kā
to mujh ko apne ka.ī dostoñ kī yaad aa.ī

tumhārī yaad ko rah rah ke gher laatī hai
mah o nujūm kī tābish guloñ kī rānā.ī

jab se bichhaḌ ga.ī tirī ḳhāna-ba-dosh yaad
ai 'prem' suune ghar kī tarah haiñ udaas ham

yaad hai ab tak tujh se bichhaḌne kī vo añdherī shaam mujhe
tū ḳhāmosh khaḌā thā lekin bāteñ kartā thā kājal

phir 'saif' havā-e-yād-e-rafta
har ġham kī naqāb ulaT ga.ī hai

bhūlī huī yaad aa ke kaleje ko male hai
jab shaam guzar jaa.e hai jab raat Dhale hai