Tags-Zindagi

paiġhām zindagī ne diyā maut kā mujhe
marne ke intizār meñ jiinā paḌā mujhe

vo tūl-e-umr jis meñ na ho lutf-e-zindagī
mil jaa.e misl-e-ḳhizr to kyā fā.eda mujhe

zindagī ke ḳhāka-e-sāda ko rañgīñ kar diyā
husn kaam aa.e na aa.e ishq kaam aa hī gayā

sūraj huuñ zindagī kī ramaq chhoḌ jā.ūñgā
maiñ Duub bhī gayā to shafaq chhoḌ jā.ūñgā

tā ye safar hayāt kā maqsad-e-zindagī bane
chāhiye markaz-e-nigāh gardish-e-pā ke saath saath

na ho tuġhyān-e-mushtāqī to maiñ rahtā nahīñ baaqī
ki merī zindagī kyā hai yahī tuġhyān-e-mushtāqī

zindagī se baḌī sazā hī nahīñ
aur kyā jurm hai patā hī nahīñ

maiñ talāsh-e-husn se aisā huā huuñ munsalik
jā rahā huuñ zindagī kā sāz-o-sāmāñ chhoḌ kar

vahī jaltī-bujhtī huī zindagī
vahī koshish-e-rā.egāñ har taraf

jise zindagī na bhulā sake jise maut bhī na miTā sake
vahī maiñ huuñ 'ġhālib'-e-ḳhasta-jāñ vahī 'mīr'-e-ḳhāna-ḳharāb sā

zindagī kī saḳht zanjīroñ meñ jakḌā dekh kar
aaj tum bhī hans rahe ho mujh ko tanhā dekh kar

kaun ḳhvāhish kare ki aur jiye
ek bezār zindagī ke liye

zindagī tere masā.il kā sulajhnā to alag
kis ko fursat hai yahāñ ġhaur bhī karne ke liye

jitnā terā hukm thā utnī sañvārī zindagī
apnī marzī se kahāñ ham ne guzārī zindagī

mere andar ik nayā ġham roz rakh jaatā hai kaun
rafta rafta ho rahī hai aur bhārī zindagī

ruuh kī taskīn ke saare darīche khul ga.e
dard ke pahlū meñ jab aa.ī hamārī zindagī

sirf thī ḳhāna-badoshī yā mohabbat kā junūñ
hijrateñ kartā rahā ik shaḳhs saarī zindagī

ek lafz-e-kun kahā ābād sannāTe hue
āsmānoñ se zamīnoñ par utārī zindagī

is sazā se to mirā jī hī nahīñ bhartā hai
zindagī kaise gunāhoñ kī sazā hai yaaro

koī tahrīr nahīñ hai jise paḌh le koī
zindagī ho ga.ī be-nām sī uljhan kī tarah