Tags-Zindagi

ek zarra bhī na mil pā.egā merā mujh ko
zindagī tū ne kahāñ lā ke bikherā mujh ko

vo lamha-e-shu.ūr jise jāñ-kanī kaheñ
chehre se zindagī kī naqābeñ ulaT gayā

hamīñ ko muḌ ke na dekhā hamīñ se kuchh na kahā
is ehtiyāt se ham zindagī ke saath chale

ham jo TuuTe haiñ batā haar bhalā kis kī huī
zindagī terī uThā.ī huī saugand the ham

tum mile to mil ga.ī hai zindagī
marte marte bhī sahārā mil gayā

jo kho gayā hai kahīñ zindagī ke mele meñ
kabhī kabhī use aañsū nikal ke dekhte haiñ

zindagī ko ham vafā tak vo jafā tak le ga.e
apne apne fan ko donoñ intihā tak le ga.e

abad ke samundar kī ik mauj jis par mirī zindagī kā kañval tairtā hai
kisī an-sunī dā.imī rāgnī kī koī taan āzurda āvāra barbād

chaak kar kar ke garebāñ roz siinā chāhiye
zindagī ko zindagī kī tarah jiinā chāhiye

maiñ jis meñ kho gayā huuñ mirā ḳhvāb hī to hai
yak do nafas numūd sahī zindagī to hai

ek lamhe kī ḳhatā phailī to saarī zindagī
chubhte zarre kāñch ke palkoñ se chunvātī rahī

hai raushnī kā havāla parāyā des magar
taras rahī hai ujāloñ ko zindagī merī

vo hasrat-e-bahār na tūfān-e-zindagī
aatā hai phir rulāne ko abr-e-bahār kyuuñ

jab zindagī kā maut se rishta hai munsalik
phir ham-nashīñ hai ḳhatra-e-lail-o-nahār kyuuñ

lagāyā hai dil bhī to patthar se maiñ ne
mirī zindagī kī yahī ik ḳhatā hai

muddatoñ baad ham kisī se mile
yuuñ lagā jaise zindagī se mile

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo

nizām-e-husn se vāqif ho phir vafā kaisī
unhīñ pe miT ke na.ī zindagī kī baat karo

zindagī kārvāñ kā hissa hai
hijr kī dāstāñ kā hissa hai

bas ek ḳhvāhish madār thī apnī zindagī kā
kisī ke hāthoñ meñ apnā dār-o-madār rakh deñ