Tags-Zindagi

vo kaun haiñ jinheñ tauba kī mil ga.ī fursat
hameñ gunāh bhī karne ko zindagī kam hai

agar na zohra-jabīnoñ ke darmiyāñ guzre
to phir ye kaise kaTe zindagī kahāñ guzre

hameñ nasīb se qur.ān lā-javāb milā
varaq jahāñ se khulā zindagī kā baab milā

mirī zindagī kī urūs-e-nau tujhe is kī koī ḳhabar bhī hai
vo thī kis kī surḳhī-e-ḳhūn-e-dil tirī maañg meñ jo bharī rahī

maanā ye zindagī hai fareboñ kā silsila
dekho kisī fareb ke jauhar kabhī kabhī

vo kaun thā jo mirī zindagī ke daftar se
hurūf le gayā ḳhālī kitāb chhoḌ gayā

sar pe sūraj ke hamāre pyaar kā saaya rahe
māmtā kā jism māñge zindagī kī baat ko

zindagī jal chukī thī lakḌī sī
raakh bas bach ga.ī nishānī meñ

ġharīb akbar ke gard kyuuñ meñ ḳhayāl vaa.iz se koī kah de
use Darāte ho maut se kyā vo zindagī hī se Dar chukā hai

zindagī tū ne lahū le ke diyā kuchh bhī nahīñ
tere dāman meñ mire vāste kyā kuchh bhī nahīñ

bahāne aur bhī hote jo zindagī ke liye
ham ek baar tirī aarzū bhī kho dete

hādsoñ kī maar se TuuTe magar zinda rahe
zindagī jo zaḳhm bhī tū ne diyā gahrā na thā

kuchh is tarah se basar kī hai zindagī maiñ ne
ġhamoñ kī chhāñv meñ DhūñDī hai sarḳhushī maiñ ne

aap aa.e the zindagī merī
raat kī raat aur hī kuchh thī

zindagī ne tire milne kā bahāna samjhā
varna dar-asl qayāmat hai na milnā terā

zindagī ik āñsuoñ kā jaam thā
pī ga.e kuchh aur kuchh chhalkā ga.e

jaan bhī saath chhoḌ detī hai
ye sabaq zindagī se miltā hai

zindagī samjhūñ ise yā ki ise maut kahūñ
vo jo mehmān kī sūrat mire ghar meñ aa.ī

ḳhvāb hī ḳhvāb kī ta.abīr huā to jaanā
zindagī kyuuñ kisī āñkhoñ ke asar meñ aa.ī

zindagī kuchh hai 'atā' sher-o-adab hai kuchh aur
ye do-rañgī kī vabā kaisī hunar meñ aa.ī