Tags-Zindagi

tum apne ġham kī talḳhī bhī milā do
sharāb-e-zindagī meñ hai nasha kam

adab hī zindagī meñ jab na aayā
adab meñ itnī mehnat kis liye hai

ajnabī rah-guzar meñ bikhrī haiñ
zindagī kī nishāniyāñ tauba

aarzū kā 'azīz' tāj-mahal
zindagī kī tabāhiyāñ tauba

to zindagī ko ji.eñ kyuuñ na zindagī kī tarah
kahīñ pe phuul kahīñ par sharar banāte hue

mujhe marnā mubārak bas tamannā hai to itnī hai
bujhā deñ vo charāġh-e-zindagī ḳhud apne dāmāñ se

bajā hai zindagī se ham bahut rahe nārāz
magar batāo ḳhafā tum se bhī kabhū hue haiñ

is zindagī ko chāhiye sāmān-e-zindagī
kuchh bhī na ho to shīsha-o-paimāna chāhiye

har ik qadam ajal thā har ik gaam zindagī
ham ghuum phir ke kūcha-e-qātil se aa.e haiñ

thī siyāhiyoñ kā maskan mirī zindagī kī vaadī
tire husn ke tasadduq mujhe raushnī dikhā dī

zindagī dasht-e-safar dhuup hī dhuup
tere bin kaise kahāñ ke saa.e

ḳhizr kī sī zindagī hotī jo mujh nākām kī
maiñ duā-e-vasl-e-jānāñ tā-qayāmat māñgtā

faqīh-e-shahr zindagī kī aañkh kā jo nuur thā
vo maiñ ne tere āstāñ pe ḳhvāb lā ke vaarā hai

ham bhī 'aslam' isī gumān meñ haiñ
ham ne bhī koī zindagī jī thī

Dho rahā thā bas yūñhī maiñ aaj tak apnā vajūd
tum se mil kar mujh ko apnī zindagī achchhī lagī

khaḌā huuñ maiñ das hazār saala qadīm duniyā ke biich 'ovaisī'
ulaT ke tārīḳh ke varaq zindagī mujhe kuchh sunā rahī hai

ye hikāyat tamām ko pahuñchī
zindagī iḳhtitām ko pahuñchī

aisā lagtā hai dohrā rahā huuñ maiñ kuchh
zindagī ke purāne shumāre uThā

ye jo kaam rah ga.e haiñ unheñ rakh ke jā rahī huuñ
mirī zindagī maiñ tujh se bahut thak ke jā rahī huuñ

jahāñ us ne muḌ ke dekhā vahīñ zindagī rukī thī
ye jo hairateñ haiñ dil kī maiñ jhaTak ke jā rahī huuñ