Tags-Zindagi

vo saañs le rahā hai magar zindagī kahāñ
shīshe meñ band laakh kā paikar hai sāmne

ek insāñ kī haqīqat kyā hai
zindagī se use nisbat kyā hai

āñkhoñ meñ zindagī kī tarah aa basā hai vo
merī nazar meñ pahle jo manzar ḳharāb thā

ham bhī jiine kā mohabbat meñ tamāsha kar leñ
zindagī jo hai tamāsha to tamāsha hī sahī

zindagī raat thī guzar hī ga.ī
ik ajab baat thī guzar hī ga.ī

vo nazar mehrbāñ agar hotī
zindagī apnī mo'tabar hotī

un se mansūb ho ga.e varna
zindagī kis tarah basar hotī

zindagī kī dhuup meñ murjhā gayā merā shabāb
ab bahār aa.ī to kyā abr-e-bahār aayā to kyā

vo to ab bhī ḳhvāb hai bedār bīnā.ī kā ḳhvāb
zindagī meñ ḳhvāb meñ us ke guzār aayā to kyā

nashshe kā ye aalam hai sach hī sach lage sab kuchh
zindagī kī sahbā hai mai-kada hai ḳhvāboñ kā

zindagī meñ us ko kaif-e-zindagī hāsil nahīñ
jis kā dil rāz-o-niyāz-e-ishq ke qābil nahīñ

zindagī bhī mire nāloñ kī shanāsā niklī
dil jo TuuTā to mire ghar meñ koī sham.a jalī

kahāñ ye hosh ki auroñ kī zindagī pe hañseñ
ḳhud apne haal pe ḳhandāñ haiñ tere dīvāne

vo jo shā.irī kā sabab huā
mirī zindagī kā sabab huā

ahl-e-vafā meñ maut kī talḳhī ko sar-ba-sar
qañdāb-e-zindagī se sivā kar diyā gayā

sharāre zindagī ke dekhtā huuñ raakh meñ pinhāñ
mire haq meñ ye ḳhāk-e-āshiyāñ iksīr hai saaqī

tañg aa kar gardish-e-ayyām se bahr-e-sujūd
vo to merī zindagī vaqf-e-duā thī maiñ na thā

tirā ishq hai mirī zindagī tirā zikr hai mirī bandagī
tujhe yaad kartā huuñ maiñ sadā mujhe kaam hai isī kaam se

ai ġham-e-zindagī na ho nārāz
mujh ko aadat hai muskurāne kī

zindagī hasratoñ kī mayyat hai
phir bhī armān kar rahī ho nā