Tags-Zindagi

tere baġhair jī to na sakte the ham magar
ġham terā zindagī kā sahārā banā rahā

zindagī bhar rahe haiñ añdhere meñ ham
raushnī se pareshān hote hue

dard-e-dil yaar rahā dard se yaarī na ga.ī
zindagī ham se to be-lutf gizārī na ga.ī

us lab o chashm se hai zindagī o maut apnī
ki kabhī pal meñ jalāyā kabhī pal meñ maarā

aap uTheñge kab āġhosh-e-tamannā se mirī
zindagī kā shab-e-furqat ne agar saath diyā

badal ga.e haiñ shab-o-roz-e-zindagī 'bismil'
vo māhtāb nahīñ ab vo āftāb nahīñ

irāda to nahīñ hai ḳhud-kushī kā
magar maiñ zindagī se ḳhush nahīñ huuñ

kaTtī hai aarzū ke sahāre pe zindagī
kaise kahūñ kisī kī tamannā na chāhiye

ka.ī mavāqe mirī zindagī meñ aa.e magar
kisī pe hañs liye itnā ki phir hañsā na gayā

gañvā.ī kis kī tamannā meñ zindagī maiñ ne
vo kaun hai jise dekhā nahīñ kabhī maiñ ne

shahr ho bayābāñ ho daar ho ki zindāñ ho
naġhme zindagī hī ke gaa.e chār-sū ham ne

ḳhudā kī raah pe chal kar dikhā.iye 'ġhāzī'
jo kāmyāb tumheñ zindagī banānī hai

inhī hairatoñ meñ basar huī na ḳhabar huī ki sahar huī
ye tamām arsa-e-zindagī ki muhīt-e-shām-e-visāl thā

zindagī yuuñ bhī zindagī Thahrī
kaTte kaTte bhī der lagtī hai

lafz kī nāzuk sadā par zindagī kā bojh hai
baat bhī duniyā ḳharīde is jahāñ meñ tol kar

ḳhauf-o-dahshat ke asar se chand biphre naujavāñ
zindagī ko kar rahe the har taraf khul kar shikār

ye jo zindagī kī haiñ gutthiyāñ ye sulajh ke bhī na sulajh sakīñ
haiñ agarche vaj.h-e-sukūn ham yahāñ shādmāñ koī aur hai

chhoḌ de āsān rasta zindagī dushvār kar
jis taraf dariyā chaḌhā ho us taraf se paar kar

zindagī pyārī hai logoñ ko agar itnī 'malāl'
kyuuñ masīhāoñ ko zinda nahīñ rahne dete

kis zindagī ke moḌ pe laayā gayā mujhe
maiñ hañs rahī thī aur rulāyā gayā mujhe