Tags-Zindagi

yahī hai anjām zindagī kā lahū meñ Duubā hai dekho sūraj
chamak rahā thā jo āsmāñ par ab us kā saaya bhī Dhal rahā hai

zindagī tū ne qadam moḌ diye aur taraf
aur andar se mujhe aur safar par rakkhā

pūchhā na zindagī meñ yuuñ to kisī ne aa kar
marne ke ba.ad jo thā vo mujh ko pūchhtā thā

guzar ga.ī thī tire saath zindagī kuchh din
phir us ke ba.ad maza zindagī kā aa na sakā

sañg kyā hai bas sarāpā intizār-e-but-tarāsh
zindagī kā ḳhvāb logo yuuñ bhī dekhā jaa.e hai

zindagī aag hai aur aag kī ḳhātir ham ne
diip kī aañkh meñ jaltā huā chehrā dekhā

zaḳhm jo tum ne diyā vo is liye rakkhā harā
zindagī meñ kyā bachegā zaḳhm bhar jaane ke ba.ad

zindagī ḳhānqāh-e-shahūd-o-baqā
aur lauh-e-mazār-e-fanā aadmī

zindagī āḳhir pashemāñ kar ga.ī
ham isī mohlat pe itrā.e bahut

zindagī se duur kab tak jāoge
kis tarah sachchā.ī ko jhuTlāoge

sādgī itnī miyāñ achchhī nahīñ
zindagī meñ roz dhokā khāoge

talḳh yādeñ dil se miTtī hī nahīñ
zindagī meñ chain kaise pāoge

zindagī ik dūsre ko DhūñDne meñ kaT ga.ī
justujū merī bhī dushman thī adū us kī bhī thī

maiñ 'rabāb' is se ziyāda tujhe ab kyā detī
zindagī maiñ ne tire naam pe vaarī pāgal

mauj-dar-mauj marī zindagī girdāb meñ hai
is safīne ko kināre se lagā do koī

dam ġharībī meñ nikaltā na Thahartā hai 'rabāb'
zindagī sard chitā ho to ġhazal kyā kahiye

baḌī mushkil se samjhe haiñ shahīd-e-ishq kā mansab
'sahar' ab zindagī bār-e-girāñ mālūm hotī hai

kabhī the us meñ mirī zindagī ke hañgāme
vo ik galī jo guzargāh-e-dushmanāñ Thahrī

zindagī jabr hai aur jabr ke āsār nahīñ
haa.e is qaid ko zanjīr bhī darkār nahīñ

āñkheñ bujhī bujhī haiñ to manzar miTe miTe
ai zindagī kahāñ se tujhe āb-o-rañg duuñ