Tags-Zindagi

tere jaane kā manzar hī ġham-ḳhvār thā
zindagī bhar jo āñkhoñ se lipTā rahā

maanā kisī kā dard ġham-e-zindagī nahīñ
phir bhī kisī ke dard se kyā kyā gile hue

tujh ko paanā to yārab thā āsāñ bahut tujh ko paane kī koshish hī maiñ ne na kī
zindagī har qadam jaise ik bojh sī merī sāñsoñ kī raftār par ho ga.ī

na zindagī ne qubūlā na maut ne pūchhā
ḳharāb-hāl zamāna bahut ḳharāb huā

judā.ī bhī na hotī zindagī bhī sahl ho jaatī
jo ham ik dūsre se mas.ala tabdīl kar lete

niiñd TuuTī ki ye zālim mujhe mil jaatī hai
zindagī ko kabhī sapnā nahīñ likhkhā maiñ ne

zindagī manzil-e-maqsūd se āgāh nahīñ
us kī me.arāj hai parvāz sar-e-bām abhī

haa.e vo zindagī-fareb āñkheñ
tū ne kyā sochā maiñ ne kyā samjhā

ba.ad marne ke jo hāsil hogī rusvā.ī mujhe
zindagī kyā soch kar duniyā meñ tū laa.ī mujhe

aa.ina bhī thā koī kyā zindagī kā aa.ina
dekhne par maut kī sūrat nazar aa.ī mujhe

zindagī kī kashmakash se dast-kash honā paḌā
naza.a meñ yaad aa ga.ī jab un kī añgḌā.ī mujhe

kartā hai barham nizām zindagī
sirf māl-o-zar se us ko pyaar hai

aao mil-jul kar use ham tai kareñ
zindagī kā jo safar dushvār hai

vo ta.alluq zindagī jis meñ rahā bil-vāsta maiñ
us samet ik din sipurd-e-tāq-e-nisyāñ ho gayā maiñ

'nazar' tum zindagī samjhe ho jis ko
faqat paanī kā ho vo bulbula to

aql kuchh ziist kī kafīl nahīñ
zindagī itnī be-sabīl nahīñ

juā hai zindagī jaise
jo jiite us ko hāsil huuñ

aa dost saath aa dar-e-māzī se maañg laa.eñ
vo apnī zindagī ki javāñ bhī hasīñ bhī thī

maiñ akasr sochtī huuñ zindagī ko kaun likkhegā
na maiñ likkhūñ to phir is bebasī ko kaun likhegā

ye zindagī kā safar bhī hai kuchh ajiib safar
qadam qadam pe maqāmāt aa.e haiñ kyā kyā