Tags-Zindagi

baiThe haiñ ham tasavvur-e-gesū-e-yār meñ
is zindagī ko ḳhvāb-e-pareshāñ kiye hue

zindagī maut meñ maḳhfī hai yaqīnan apnī
misl-e-parvāna chalo ham bhī to jal kar dekheñ

ḳhizāñ kā daur hai magar vo is adā se aa.e haiñ
bahār 'darshan'-e-hazīñ kī zindagī pe chhā ga.ī

jo jhuTlātā rahā hai zindagī ko
zarā pahchān leñ us aadmī ko

na dekhā tum ne saḌkoñ se guzarte
bikhartī saañs letī zindagī ko

musībat aa to ga.ī thī lekin huī vo aap ulTe paañv ruḳhsat
lagā jo thā zindagī kā kāñTā nikal gayā chaar din khaTak kar

zīnat-e-malbūs-e-hastī baḌh ga.ī jis daaġh se
zindagī bhar maiñ ne aise daaġh ko dhoyā nahīñ

zindagī bhar mujhe jalne ke liye chhoḌ diyā
sabz pattoñ meñ ye kyā aag lagā dī tū ne

rakh lo ki zindagī meñ kabhī kaam ā.eñgī
dīvāngān-e-ishq kī bhī kuchh nishāniyāñ

guzartī hai maze se vā.izoñ kī zindagī ab to
sahārā ho gayā hai diin duniyā-dār logoñ kā

ġham na ho zindagī agar tujh meñ
terā honā fuzūl ho jaa.e

har galī kī moḌ par ik piir hai baiThā huā
pūchhtā hai jis se har ik zindagī kā rāsta

bamba.ī meñ ġham-gusār-e-zindagī miltā nahīñ
piir to milte haiñ lekin aadmī miltā nahīñ

zindagī kā rāsta is tarah mil saktā nahīñ
ġhuncha-e-ummīd in pīroñ se khil saktā nahīñ

haif tujh ko zindagī kā rāsta miltā nahīñ
piir milte haiñ tujhe lekin ḳhudā miltā nahīñ

yahāñ jo ik charāġh-e-zindagī thā
na jaane ab kahāñ rakkhā huā hai

aap ke saath muskurāne meñ
zindagī ek phuul hotī hai

vahī ek yaad kiran kiran mirī zindagī meñ hai zau-fagan
vahī ek chehra chaman chaman sar-e-dasht-e-jāñ hai khilā huā

dikhā.e haiñ tamāshe zindagī ne
magar jiine ke qābil ho ga.ī hai

shaiḳh sāhab se rasm-o-rāh na kī
shukr hai zindagī tabāh na kī