Tags-Aah

sehat dil-o-dimāġh baqā aur zindagī
in ne.amatoñ se duur rahe aah aadmī

āh-e-sard aur bhī bhaḌkātī hai shola dil meñ
ye diyā vo hai jo phūñkoñ se bujhā.e na bane

mujh se phir jaa.e jo duniyā to balā se phir jaa.e
tū na ai aah zamāne kī havā ho jaanā

tumhārī yaad jab dil se mire lipTī ġhazal kah dī
taḌap kar jab kabhī āh-o-fuġhāñ uTThī ġhazal kah dī

aah bhī ik koshish-e-nākām hai mere liye
aisī sahbā-e-kuhan aur ḳhaam hai mere liye

hijr meñ āh-o-bukā rasm-e-kohan hai lekin
aaj ye rasm hī doharāo ki kuchh raat kaTe

hamdamo ye koī ronā hai ki tūfān hai aah
dekhiyo chashm se dariyā kā ubal kar aanā

jaa.e hai tanhā shab-e-tārīk meñ vo mehr-vash
āh-e-ātish-bār le kar māhtābī tū pahuñch

aah niklī shumār se bāhar
ashk ho paa.e bas ki chand hazār

tū bhalī baat se hī merī ḳhafā hotā hai
aah kyā chāhnā aisā hī burā hotā hai

āh-e-dil ne diyā sahārā kuchh
jab baḌhā zor nā-tavānī kā

aah us bhūke pe sau afsos hai
naan kāchī hai talag phūTe tavā

kis se kahūñ apnā ġham-e-dil aah azīzāñ
duniyā meñ koī mūnis-o-ġham-ḳhvār na paayā

zaḳhm kaise phalte haiñ daaġh kaise jalte haiñ dard kaise hotā hai koī kaise rotā hai
ashk kyā hai naale kyā dasht kyā hai chhāle kyā aah kyā fuġhāñ kyā hai tum na jaan pāoge

dil meñ phir girye ne ik shor uThāyā 'ġhālib'
aah jo qatra na niklā thā so tūfāñ niklā

tumhīñ to ho vo jo dard-o-alam meñ rakhte ho
hamīñ to haiñ vo jo āh-o-fuġhāñ meñ rahte haiñ

koī nahīñ kartā jo kiyā tū ne 'nazīr' aah
dil us ko diyā jis ke nahīñ naam se vāqif

mar kar bhī tah-e-ḳhāk na āsūda hue aah
ai ishq na the ham tire anjām se vāqif

husn bhī vo na rahā pahlā sā dildār-e-hunar
aah pahlī sī vo ab azmat-e-tesha bhī kahāñ

multafit ḳhud na ho agar koī
aah be-sūd aur fuġhāñ be-kār