Tags-Aah

mere nasīb meñ sahī āh-o-fuġhāñ magar
ab to sunā.ī detī haiñ shahnā.iyāñ mujhe

vo ġhairoñ ko adā se qatl jab bebāk karte haiñ
to us kī teġh ko ham aah kis hairat se takte haiñ

biich meñ hai mere us ke tū hī ai āh-e-hazīñ
sulh kyūñkar hove jab tak darmiyāñ koī na ho

pūchhī na chashm-e-tar kī na āh-e-rasā kī baat
karte rahe vo mujh se bas āb-o-havā kī baat

aah karte haiñ hazāroñ dil-figār
par na TuuTā terā ḳhanjar āsmāñ

ye ġham nahīñ hai ki ab āh-e-nā-rasā bhī nahīñ
ye kyā huā ki mire lab pe iltijā bhī nahīñ

jo kui ġham kā hisār-e-qalb chāhe
ġhubār-e-āh siiñ dīvār bāñdhe

dil to na dete ham aah le ga.ī lekin 'nazīr'
us kī jabīñ kī hayā aur vo āñkhoñ kī laaj

maqām-e-ibrat hai aah ai dil ḳhudā hī kī hai panāh ai dil
nahīñ hai kuchh zād-e-rāh ai dil adam se tākīd hai safar kī

fā.eda aane se aise aa ke pachhtā.eñ haiñ ham
uTh ga.e jab yaañ ke guzre aah tab aa.eñ haiñ ham

nā-tavānī se hai hālat ġhair hijr-e-yār meñ
dam nikal jaatā hai apnā saath har ik aah ke

laraz rahe haiñ falak 'ārzū' ki āh-e-rasā
chalī hai teġh-ba-kaf fat.h-e-haft-ḳhvāñ ke liye

huā do-chand alam aah roz-e-yak-shamba
vo āftāb mirā aayā āftāb ke din

maarā hai kohkan ne sar apne pe tesha aah
dil ko lagī ho choT to kyā aadmī kare

ik āh-e-zer-e-lab ke gunahgār ho ga.e
ab ham bhī dāḳhil-e-saf-e-aġhyār ho ga.e

na sune aur na hargiz dekhe
dostoñ meñ ho agar aib bhī aah

ham aah bhī karte haiñ to ho jaate haiñ badnām
vo qatl bhī karte haiñ to charchā nahīñ hotā

ḳhunuk diloñ kī agar āh-e-sard dozaḳh meñ
paḌe to vāqa.ī ik baar aag daab to de

kab farāġhat thī ġham-e-sub.h-o-masā se mujh ko
roz o shab kaam rahā āh-o-bukā se mujh ko