Tags-Aah

ise raste meñ bas taqdīr hī roke to ruktī hai
muġhal kī aah par tāsīr hī roke to ruktī hai

āh-e-rasā ḳhudā ke liye dekh-bhāl ke
un kā bhī ghar milā huā dushman ke ghar se hai

mujh se bigaḌ kar apne ghar jā.iye ḳhair jā.iye
aap ne ye samajh liyā aah meñ kuchh asar nahīñ

kyā bhaḌke hai siine meñ mire ātish-e-furqat
jo aah ke ham-rāh nikaltā hai dhuāñ surḳh

dil bhī le kar alam-e-āh muqābil pahuñchā
neza-bāzān-e-mizha jab ba-taġhāful pahuñche

aah vo yaad ki us yaad ko ho kar majbūr
dil-e-māyūs ne muddat se bhulā rakkhā hai

yuuñ uThe aah us galī se ham
jaise koī jahāñ se uThtā hai

aah se yā aah kī tāsīr se
jī bahal jaatā kisī tadbīr se

rāz-poshī merī dūd-e-āh kī
dūd-e-qulyāñ kar jo tujh se ho sake

rāz-e-dil zāhir na ho ai dūd-e-āh
daaġh pinhāñ kar jo tujh se ho sake

kisī aah meñ nahīñ soz jab kisī naale meñ jab asar nahīñ
ye kamāl-e-sozish-e-dil nahīñ ye faroġh-e-dāġh-e-jigar nahīñ

maiñ huuñ vahshī aah kis sahrā-e-āfat-ḳhez kā
hai gul-e-vīrāna bhī begāna-tar mere liye

chaman phūñk Dālūñgā aah o fuġhāñ se
vo merā nasheman jalā kar to dekheñ

aah ta.azīm ko uThtī hai mire siine se
dil pe jab us kī nigāhoñ ke ḳhadañg aate haiñ

vafā kī nazr hai merī hī jān-e-hasrat-ālūda
asar kī qadr hai merī hī āh-e-qāfila-zan tak

us kūche kī havā thī ki merī hī aah thī
koī to dil kī aag pe pañkhā sā jhal gayā

dekh 'ārif' ye auj-e-ishq bhī dekh
ik tarāna hai lab pe aah nahīñ

tā-sub.h mirī āh-e-jahāñ-soz se kal raat
kyā gumbad-e-aflāk ye hammām sā thā garm

vāshud kī dil ke aur koī raah hī nahīñ
juz ye ki aah kījiye so aah hī nahīñ

sun lī agar kisī kī kabhī āh-e-dil-ḳharāsh
nashtar sā ek dil meñ utartā chalā gayā