Tags-Aah

ye ab kī shab-barāt ai yaar tujh bin ham pe yuuñ guzrī
havā.ī to hamārī aah thī aur ashk phul-jhaḌiyāñ

kyā ḳhabar thī rāz-e-dil apnā ayaañ ho jā.egā
kyā ḳhabar thī aah kā shola zabāñ ho jā.egā

khule jo aah meñ bāb-e-asar na pahchāne
ḳhushī kā rañg ġham-e-mo'tabar na pahchāne

saaqī ko jaam dene meñ us ḳhush-nigah ko aah
har dam ishārateñ haiñ ki us ke ta.iiñ nahīñ

āh-e-jāñ-soz kī mahrūmi-e-tāsīr na dekh
ho hī jā.egī koī jiine kī tadbīr na dekh

mere gulzār meñ haiñ sho.ale phuul
mere har aah sho.ala-bār daraḳht

āḳhirī ḳhat mujhe milā terā
aah likh kar na dil dukhā terā

falak ne aah tirī rah meñ ham ko paidā kar
ba-rañg-e-sabza-e-nūrasta pā.emāl kiyā

dard-e-dil kī unheñ ḳhabar na huī
aah minnat-kash-e-asar na huī

hue haiñ āshiqāñ kī fauj meñ ham sāhib-e-naubat
bajāyā aah ke Dañke setī dil kā naqārā hai

gire haiñ TuuT kar kuchh aa.ine shāḳhoñ kī palkoñ se
ye kis kī aah thī kyuuñ shabnamistānoñ ke dil TuuTe

hai vo nāvak-fagan sharaf jis ke
nāvak-e-āh kī kamāñ dil hai

naala ho yā ki aah ho shaam ho yā pagāh ho
dil meñ butoñ ke haa.e haa.e kiije asar kisī tarah

nahīñ hai fursat-e-ik-dam pa aah us ko nazar
habāb dekhe hai āñkheñ nikāl ke kaisā

us kā jo bas jī bas mujhe yaad aave hai to aah
pahroñ talak maiñ kahtā huuñ har baar bas jī bas

nargisī chashm thā vo kāfir aah
jis ke bīmār-o-mubtalā haiñ ham

mujh ko jalā ke ḳhaak kyā aur bahā diyā
tum se to ye na thī mujhe ai ashk-o-āh chashm

zindagī kitnī hasīñ kitnī baḌī ne.amat hai
aah maiñ huuñ ki use pā ke bhī sharminda huuñ

mīr-e-sipāh nā-sazā lashkariyāñ shikasta saf
aah vo tīr-e-nīm-kash jis kā na ho koī hadaf

na zabt se shikva lab tak aayā na sabr ne aah khīñchne dī
rahā dahan meñ vo qufl ban kar girāyā chhātī pe sañg ho kar