Tags-Bahana

ishq to ab sher kahne kā bahāna rah gayā
harf ko rakhtā huuñ raushan sho.ala-e-afkār se

ḳharāb-e-dard hue ġham-parastiyoñ meñ rahe
ḳhushī kī khoj bahāna thī mastiyoñ meñ rahe

vo haq kī pyaas thī dariyā to bas bahāna thā
lab-e-furāt pe kis se javāb māñgūñ maiñ

talāsh ek bahāna thā ḳhaak uḌāne kā
pata chalā ki hameñ justujū-e-yār na thī

nayā bahāna hai har pal udaas hone kā
ye fā.eda hai tire ghar ke paas hone kā

bahāna koī to ai zindagī de
ki jiine ke liye majbūr ho jā.ūñ

kyā tujh se bahāna koī kareñ ab koī bahānā yaad nahīñ
ham aa to ga.e mahfil meñ tirī par der se aanā yaad nahīñ

milnā na milnā ek bahāna hai aur bas
tum sach ho baaqī jo hai fasāna hai aur bas

ḳhvāb āñkhoñ meñ sajānā bhī zarūrī Thahrā
zinda rahne kā bahāna bhī zarūrī Thahrā

tavānā ko bahāna chāhiye shāyad tashaddud ko
phir ik majbūr par shorīdgī kā ittihām aayā

bosa jabīñ ko pā-e-sanam kā na mil sakā
laġhzish ne be-ḳhudī kā bahāna kiyā bahut

chashm-e-sāqī kī qasam thā ye bahāna varna
kahīñ karte haiñ mai-o-jām ke pyāse tauba

payām le ke jo paiġhām-bar ravāna huā
hasad ko hiila milā ashk ko bahāna huā

kahtā thā nāsehoñ se mire muñh na aa.iyo
phir kyā thā ek hū kā bahāna bahut huā

kasīdagī-e-marāsim se mutma.in huuñ bahut
fasurda-ḳhātirī-e-yār to bahāna huā

unheñ ma.alūm haiñ majbūr jeboñ ke taqāze sab
vo in meñ ḳhūbsūrat sā bahāna chhoḌ dete haiñ

maiñ nīñdoñ kā bahāna chāhtī huuñ
tire ḳhvāboñ meñ aanā chāhtī huuñ

mar hī jaanā thā ham ko to ik roz
un kī furqat magar bahāna huā

baat kuchh bhī na thī fasāna huā
merī rusvā.ī kā bahāna huā

are ye sirf bahāna hai baat karne kā
mirī majāl ki jhagḌā karūñ janāb ke saath