Tags-Barg

matā-e-barg-o-samar vahī hai shabāhat-e-rañg-o-bū vahī hai
khulā ki is baar bhī chaman par giraft-e-dast-e-numū vahī hai

barg-e-āḳhir ne kahā lahrā ke
mujhe mausam kī anā likh denā

barg-e-hinā se likh ke nasīhat zamīn par
gulshan ko tere chhoḌ ke aurāq chal paḌe

kaash merī kah rahe haiñ sabza-o-dasht-o-daman
lāla-o-barg-o-saman aalam hai ye kashmīr kā

kis kī nazar ke kāñTe pe tultā hai barg-e-gul
tere subuk laboñ se batāyā na jā.egā

fasl-e-be-barg kuchh aisī bhī to be-rañg nahīñ
dāstāñ ahd-e-bahārāñ kī sunāne vaale

rañgoñ ke qāfile nahīñ ab mere ham-safar
hamrāh ek barg-e-azzā-dār aa.egā

ab to koī kañval nahīñ khiltā hai jhiil meñ
ab kāñTe-dār barg hī jal-thal pe chhā ga.e

ḳhizāñ tujh par ye kaisā barg-o-bār aane lagā hai
mujhe ab mausamoñ par e'tibār aane lagā hai

mire mausamoñ ke bhī taur the mire barg-o-bār hī aur the
magar ab ravish hai alag koī magar ab havā koī aur hai

zulm kī ḳhaak meñ is haq kā shajar boyā thā
sālhā-sāl meñ jo barg-o-samar laayā hai