Tags-Aaina

ḳhayāl o shauq ko jab ham tirī tasvīr karte haiñ
to dil ko ā.īna aur aañkh ko tanvīr karte haiñ

sāmne rakh kar ā.īna
chehre par hairānī rakh

kaun dekhegā mujh meñ ab chehra
ā.īna thā bikhar gayā huuñ maiñ

tumhāre dil meñ jo kuchh aa.e pinhāñ rah nahīñ saktā
tumhārā dil to koī ā.īna mālūm hotā hai

muddateñ ho ga.iiñ tanqīd nahīñ karte log
kis ne ā.īnoñ ko ā.īna dikhāyā hogā

āsmāñ bādal kā pahne ḳhirqa-e-derīna hai
kuchh mukaddar sā jabīn-e-māh kā ā.īna hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

chashm-e-karam kā shukriya pursish-e-ġham se fā.eda
kyā mirī bebasī kā haal aap par ā.īna nahīñ

aa gayā kaun ye aaj us ke muqābil 'aslam'
ā.īna TuuT gayā aks kī tābānī se

maiñ ne dekhā thā sar-e-ā.īna ik paikar kā aks
hū-ba-hū ham-shakal thā merā magar mujh sā na thā

chāhe ki aks-e-dost rahe tujh meñ jalva-gar
ā.īna-dār dil ko rakh apne safā-parast

tumhārā boltā chehra palak se chhū chhū kar
ye raat ā.īna kī hai ye din tarāshā hai

ā.īna-sifat vaqt tirā husn haiñ ham log
kal aa.ine tarseñge to sūrat na milegī

ḳhudī ke māthe pe dāġh-e-sajda havas ke chehre pe tīrgī hai
maiñ ek ā.īna le ke donoñ ko duur hī se dikhā rahā huuñ

vo aa gayā to saarā parī-ḳhāna jī uThā
ārā.ish-e-jamāl se ā.īna jī uThā

phūTe vo aañkh jo dekhe nigah-e-bad se use
ā.īne se dil-e-ārif ke musaffā hai vo ruḳh

dekhtā rah gayā ā.īna kisī kī sūrat
zulfeñ aTkheliyāñ kartī rahīñ ruḳhsāroñ se

ehsās kā vasīl-e-iz.hār hai ġhazal
ā.īna-dār-e-nudrat-e-afkār hai ġhazal

ā.īna dekh apnā sā muñh le ke rah ga.e
sāhab ko dil na dene pe kitnā ġhurūr thā