Tags-Aaina

dil ā.īna hai magar ik nigāh karne ko
ye ghar banāyā hai us ne tabāh karne ko

ā.īne ko to muñh dikhāte ho
kyā huā ham ne bhī agar dekhā

hosh uḌ na jaa.eñ san.at-e-behzād dekh kar
ā.īna rakh ke sāmne tasvīr dekhnā

ā.īna le ke kījiye itnā mushāhida
ham se sulūk-e-sharm-o-hayā kuchh na pūchhiye

hāla-e-mah pahuñche hai nuh us ko nai ḳhat-e-sāġhar us ko lage hai
ā.īna tum le kar dekho kaan kā baalā zulf kā halqa

agnī-bān haiñ terī nazreñ ā.īna mat dekh
tere shīsh-mahal kā ik ik darpan jaltā hai

ḳhāk-e-dil jauhar-e-ā.īna ke kaam aa hī ga.ī
laakh duniyā ne nigāhoñ se girānā chāhā

maiñ ne yuuñ dil ko banāyā ā.īna
ā.īna-gar ko bhī hairat ho ga.ī

zarā ā.īna dekh o husn vaale
batā de mirā pyaar kitnā hasīñ hai

vo kaun hai jo mirī hijratoñ se TuuT gayā
vo kaun shaḳhs hai jo ā.īna-misāl banā

vo jo firdaus-e-nazar hai ā.īna-ḳhāna abhī
jalva-gar jo vo na hoñ ho jaa.e vīrāna abhī

maiñ ā.īna jaisā huuñ koī toḌ na Daale
har shaḳhs mirī raah meñ patthar kī tarah hai

ā.īna TuuTe hue dil kā dikhā duuñ maiñ agar
bevafā ḳhud tirā chehra bhī utar jā.egā

mere tevar pe mirā nām-o-nasab kanda hai
dil kā ā.īna hai taḳhtī mirī peshānī kī

ā.īna-ḳhāna meñ chal baiThiye do-chār ghaḌī
dekhnā hove jo manzūr tamāshā apnā

aap paidā to kareñ dast-e-hunar phir dekhiye
aap ke hāthoñ meñ patthar ā.īna ho jā.egā

ā.īna dikhāyā to kahā ā.īna-ruḳh ne
ā.īne ko ā.īna dikhāyā nahīñ jaatā

nazar aane lage apne hī ḳhad-o-ḳhāl-e-zavāl
aur dekhā karo ā.īna banā kar us ko