Tags-Aaina

jo chashm ki hairāñ huī ā.īna hai us kī
jo siina ki sad chaak huā shāna hai us kā

allāh re husn-e-dost kī ā.īna-dāriyāñ
ahl-e-nazar ko naqsh-ba-dīvār kar diyā

us se milne ke liye jaa.e to kyā jaa.e koī
us ne darvāze pe ā.īna lagā rakkhā hai

ham-zānū-e-ta.ammul o ham-jalva-gāh-e-gul
ā.īna-band ḳhalvat-o-mahfil hai aa.ina

ā.īna dekhne kī zarūrat na thī koī
ḳhud jānte the ham ki badalne lage haiñ ham

bahut se ā.īna-ḳhāne haiñ isī bastī meñ lekin
tarastī hai hamārī aañkh chehra dekhne ko

liye haiñ bosa-e-ruḳhsāra-e-sāf
piyā hai ham ne ā.īne kā paanī

phir is se qabl ki bār-e-digar banāyā jaa.e
ye ā.īna hai ise dekh kar banāyā jaa.e

ā.īna tumhāre naqsh-e-pā kā
ḳhurshīd ko de sabaq jilā kā

chehre jo haiñ kashkol haiñ ajsām khañDar haiñ
har shaḳhs yahāñ vaqt kā ā.īna banā hai

ai shīsha-garoñ ab tak āḳhir ye kamī kyuuñ hai
ā.īna banāte ho tasvīr nahīñ bantī

mutma.in haiñ bahut aaj arbāb-e-fan apnā sarmāya-e-fikr-o-fan bech kar
jaise ā.īna rakh de koī māh-vash halqa-e-zulf kā bāñkpan bech kar

zulfeñ to sañvartī hī rahīñ bārhā lekin
ā.īna kabhī ruḳh ke barābar na huā thā

is ke darshan se milī mujh ko ḳhud apnī pahchān
shakl ik ruuh talak sūrat-e-ā.īna ga.ī

ek nihāñ-ḳhāne ke taaq par ā.īna rakkhā thā 'zeb'
ek jhalak sī apnī dekhnā aur vo merā Dar jaanā

muddatoñ se ā.īna dekhā nahīñ
koī batlā.e mujhe kaisā huuñ maiñ

kab koī tujh sā ā.īna-rū yaañ hai dūsrā
hai tū tirā hī aks numāyāñ hai dūsrā

apne chehre ko badalnā to bahut mushkil hai
dil bahal jā.egā ā.īna badal kar dekho

ai dil-e-ḳhud-nā-shanās aisā bhī kyā
ā.īna aur is qadar andhā bhī kyā