Tags-Budhapa

mohabbat hī hai asl meñ jāvedānī
buḌhāpā bhī faanī javānī bhī faanī

buḌhāpā chhā rahā hai mere har jazbe pe lekin
javāñ hotā chalā jaatā hai phir bhī kiina merā

socho to javānī kabhī vāpas nahīñ aatī
dekho to kabhī aa ke buḌhāpā nahīñ jaatā

buḌhāpā aa gayā lekin nahīñ badlā mizāj un kā
abhī tak kapḌe vo apne liye rañgīn lete haiñ

bachpan jauban aur buḌhāpā aur phir maut
sab chalte rahne kī aadat hotī hai

chhāyā rahā ho jaise buḌhāpā nafas nafas
guzrī hai aise apnī javānī parat parat

javāñ hone se pahle hī buḌhāpā aa gayā ham par
hamārī muflisī par umr kī ujlat ziyāda thī

mere afkār ke sote nahīñ thamne vaale
merī sochoñ pe buḌhāpā nahīñ aane vaalā

maut se bad-tar buḌhāpā aa.egā
jaan se achchhī javānī jā.egī

rukā mahfil meñ itnī der tak maiñ
ujāloñ kā buḌhāpā dekh aayā

hazrat-e-'dil' jab buḌhāpā aa.egā
ḳhair-maqdam ko javānī jā.egī

mirā buḌhāpā mirī ruuh kī talāsh meñ hai
mirī javānī badan ke lavāzimāt meñ gum

tajarbe bāñdh ke gaThḌī meñ rakhe kāñdhoñ par
ik buḌhāpā bhī javānī se nikal aayā hai

vaqt se pahle bachchoñ ne chehroñ pe buḌhāpā oḌh liyā
titlī ban kar uḌne vaale soch meñ Duube rahte haiñ

sub.h-e-tiflī hai buḌhāpā merā
shām-e-pīrī thī javānī merī

sarmā kī chāñdnī thī javānī guzar ga.ī
jhulsā rahī hai dhuup buḌhāpā Thahar gayā

almārī meñ tasvīreñ rakhtā huuñ
ab bachpan aur buḌhāpā ek hue

samay kī āñkhoñ se dekhiye to har ik khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

almārī meñ tasvīreñ rakhtā huuñ
ab bachpan aur buḌhāpā ek hue

ab koī din bhī buḌhāpā Thokareñ khilvā.egā
husn hai chand roza jis pe tum ko naaz hai