Tags-But

musalmāñ ho ke tark-e-but-parastī ai ma.āz-allāh
ḳhudā ko ham ne pahchānā hai shaidā-e-butāñ ho kar

sunte haiñ taa.ib huā us but ke ghar jaane se tū
kyā tirā 'bīmār' patthar kā kalejā ho gayā

kabhī mai-kada kabhī but-kada kabhī ka.aba to kabhī ḳhānqāh
ye tirī talab kā junūn thā mujhe kab kisī se lagāv thā

jaan yā dil nazr karnā chāhiye
kuchh na kuchh us but ko puujā chāhiye

yaad us but kī namāzoñ meñ jo aa.ī mujh ko
tapish-e-shauq se har baar maiñ baiThā uTThā

but lākhoñ mohabbat meñ tarāshe aise
siine meñ bahut dafn haiñ lāshe aise

husn ke baab meñ 'akbar' kī sanad kaafī hai
ham bhī har ik but-e-kamsin ko parī kahte haiñ

muzhda ye sabā us but-e-be-bāk ko pahuñchā
ye dūd-e-dil-e-soḳhta aflāk ko pahuñchā

afsos na kī dil kī kuchh qadr 'azīz' afsos
ka.aba thā use tū ne but-ḳhāna banā rakkhā

vo but ki deñ us ko to na gar de to laakh tūfāñ uThā ke dhar de
zabān phir saaf qat.a kar de jo muñh se nikle ḳhudā ḳhudā kar

ka.abe meñ ham ne jā ke kuchh aur haal dekhā
jab but-kade meñ pahuñche sūrat hī dūsrī thī

dho.egā apne talve vo but jo sañg-pāsī
shīrīñ kā be-sutūñ par naqsha ḳharāb hogā

āshiqāñ abrū-e-but kī hai taa.at iztirāb
thī namāz ahl-e-haram jab tak na thā islām raqs

ban gayā but maiñ dekh kar tum ko
dil meñ thā dekh kar guzar jā.ūñ

nahīñ vo ham ki kahne se tire har but ke bande hoñ
kare paidā bhī gar nāseh tū us ġhārat-gar-e-dīñ sā

ab to jaate haiñ but-kade se 'mīr'
phir mileñge agar ḳhudā laayā

ka.abe jā kar bhī hameñ kashf huā
but-kade meñ bhī kuchh asrār khule

rah-e-ulfat meñ yuuñ to ka.aba-o-but-ḳhāna aatā hai
jabīñ jhuktī hai lekin jab dar-e-jānāna aatā hai

duur hai manzil mirī ik jaam ai pīr-e-muġhāñ
raah meñ ā.eñge ka.aba aur but-ḳhāna abhī

in shoḳh hasīnoñ kī nirālī hai adā bhī
but ho ke samajhte haiñ ki jaise haiñ ḳhudā bhī