Tags-But

ai 'mus.hafī' is shauq se Tuk bach ke tū chalnā
suntā hai miyāñ vo but-e-ḳhūñ-ḳhār ġhazab hai

kyā huā kahiye jo us but ko ḳhudā
log bandoñ ko ḳhudā kahte haiñ

jo kuchh us but ko barahman ne kahā
ham kahīñ us se sivā kahte haiñ

dekh 'shu.ūr' us but ke aage
kaise ibādat meñ baiThā huuñ

hūreñ nahīñ 'momin' ke nasīboñ meñ jo hoeñ
but-ḳhāne hī se kyuuñ ye bad-anjām nikaltā

har chand subuk-dast hue but-shikanī meñ
ham haiñ to abhī raah meñ hai sañg-e-girāñ aur

ye turfa hai mājrā ki ka.aba-e-dil meñ
'āfrīdī' kī ham ne but-parastī dekhī

zindagī kī ham ne mar-mar ke basar
vo but-e-tarsā jo tarsātā rahā

zāhid ke dil meñ but hai musalmāñ nahīñ rahā
ye barahman hai sāhab-e-īmāñ nahīñ rahā

yād-e-ḳhudā hī ka.aba-e-dil meñ basā.iye
ab ek but bhī dushman-e-īmāñ nahīñ rahā

hai āshiqī meñ rasm alag sab se baiThnā
but-ḳhāna bhī haram bhī kalīsā bhī chhoḌ de

kī supurd-e-dar-e-but-ḳhāna ajal ne mirī ḳhaak
kis ko sauñpā mujhe zālim ne ḳhudā ke badle

aise bohtān lagā.e ki ḳhudā yaad aayā
but ne ghabrā ke kahā mujh se ki qur.ān uThā

ātish-e-ishq se jal jal ga.e parvāne se
pahle ye aag lagī kaaba o but-ḳhāne se

ḳhudā shāhid hai is kā phir nahīñ miltī nahīñ miltī
tabī.at apnī jis se o but-e-be-pīr phirtī hai

bhejā apnā ḳhayāl us but ne
jab sunā 'muntahī' akele haiñ

sājid-o-masjūd ham bāham the ham donoñ kā dil
ka.abe kā ka.aba thā aur but-ḳhāne kā but-ḳhāna thā

kabhī dair meñ the kisī but pe fidā kabhī ka.abe meñ karte jā ke duā
tire kūche meñ baiThe to ḳhuub huā ki kashākash-e-dair-o-haram se chhuTe

ai but na mujh ko hargiz kūche se ab uThānā
aayā huuñ yaañ talak maiñ zālim ḳhudā ḳhudā kar

us but ke sitam sah ke dikhā hī diyā ham ne
go apnī tabī.at meñ baġhāvat bhī bahut thī