Tags-Charagh

bujhe charāġh jalāne meñ der lagtī hai
nasīb apnā banāne meñ der lagtī hai

vo faroġh-baḳhsh-e-har-anjuman ki zamāna-bhar meñ thā zau-fagan
vo charāġh-e-bazm gah-e-vatan kisī tīra-dil ne bujhā diyā

maiñ us ke hijr kī tārīkiyoñ meñ Duubā thā
vo aayā ghar meñ mire aur charāġh-e-ḳhāna huā

hai ruuh tārīkiyoñ meñ hairāñ bujhā huā hai charāġh-e-manzil
kahīñ sar-e-rāh ye musāfir paTak na de bojh zindagī kā

zarā se rizq meñ barkat bhī kitnī hotī thī
aur ik charāġh se kitne charāġh jalte the

charāġh-e-lāla hai raushan na surḳh rū-e-hinā
fazā-e-sehn-e-gulistāñ hai yāsmīñ kī taraf

kahtā tirā kuchh soḳhta-jāñ lek ajal ne
fursat na use misl-e-charāġh-e-saharī dī

balā-kashoñ kī duā hai ki ai ḳhudā na miTe
jigar kā daaġh ki chashm-o-charāġh-e-hijrāñ hai

jabīn charāġh muqaddar kushāda dhuup sahar
ġhurūr qahr ta.ajjub kamāl nuur bharī

kisī ke nuur ko chuñdhiyā ke dekheñ hairat se
charāġh jugnū sharar āftāb phuul jhaḌī

parvāne kī tarah na bujhā de charāġh-e-husn
tūtī-e-ḳhat ke ātish-e-ruḳh se jalāo par

jo jalātā hai mire ġham ke añdheroñ meñ charāġh
mere hāthoñ meñ vahī haat kabhī ho ki na ho

āñdhiyāñ ab hameñ mahsūr kiye baiThī haiñ
ab to ham sirf ḳhayāloñ meñ jalāte haiñ charāġh

raat aatī hai to tāqoñ meñ jalāte haiñ charāġh
ḳhvāb zinda haiñ so āñkhoñ meñ jalāte haiñ charāġh

ḳhvāb bikhre haiñ hamāre yahāñ har gaam so ham
shaam hote hī ḳharāboñ meñ jalāte haiñ charāġh

tishna-lab ā.eñge dariyāoñ ke Thukrā.e hue
isī baa.is to sarāboñ meñ jalāte haiñ charāġh

tanz kartā huā guzrā thā havā kā jhoñkā
tab se ham tez havāoñ meñ jalāte haiñ charāġh

Thokareñ khāte hue umr kaTī apnī so ham
dūsroñ ke liye rāhoñ meñ jalāte haiñ charāġh

har-chand mere saath udāsī safar meñ hai
raushan charāġh-e-shauq magar chashm-e-tar meñ hai

itnī qīmat-e-shām-e-safar duuñ ye nahīñ hogā
apne charāġh ko ḳhud gul kar duuñ ye nahīñ hogā