Tags-Clash

talātum hai umīdoñ kā tasādum ārzūoñ kā
dil-e-hañgāma-parvar kaun terā rāzdāñ hogā

iḳhtilāfāt zehn-o-dil meñ the
ik tasādum sadā rahā mujh meñ

nazroñ meñ tasādum dil meñ chubhan ik sham.a hai ik parvāna hai
donoñ hī meñ bāteñ hotī haiñ āvāz kā lekin naam nahīñ

ḳhudā maiñ ho gayā phir ik tasādum
aqīdoñ meñ siyāsat aa ga.ī hai

hogā donoñ kā ḳhātma bil-ḳhair
ab tasādum meñ hai na jiit na haar

jab tak ki mohabbat meñ dil dil se nahīñ miltā
nazroñ ke tasādum par ham ġhaur nahīñ karte

ajab shab-o-roz kā tasādum huā hai mujh meñ
maiñ ik sitāra huuñ yā havā huuñ kise ḳhabar hai

ye nuz.hat-o-nik.hat kā tabassum vo tasādum
ye abr-e-karam aur hai aahoñ kā dhuāñ aur

tasādum ke alāva an-ginat zimnī masā.il haiñ
tirī hastī se vābasta hamāre sāmne mat aa

vo us nazar kā tasādum vo hoñT kī jumbish
tamām kar gayā mujh ko kalām karte hue

hameñ bhī zarūrat thī ik shaḳhs kī
ye husn-e-tasādum bahut ḳhuub hai

musālahat bhī nahīñ hai sarisht meñ apnī
magar kisī se tasādum kā hausla bhī nahīñ

dil salāmat rahe tūfāñ se tasādum meñ magar
haath se chhūT gayā haath pareshānī meñ

jo maal us ne sameTā thā vo bhī saarā gayā
vo ḳhvāhishoñ ke tasādum meñ aaj maarā gayā

zindagī jin ke tasādum se hai zaḳhmī 'farhat'
dil unhīñ TuuTe hue sapnoñ kā darpan māñge

ḳhvāb hī is baar dekhā thā kabhī maiñ ne jise
dū-badū us se tasādum ittifāqan ho gayā

vo kisī chhat kisī dīvār se roke na rukī
garm hoñToñ ke tasādum se jo ubhrī āvāz

tez qadmoñ se chalo aur tasādum se bacho
bhiiḌ meñ sust chaloge to kuchal jāoge

hai dil meñ zabt aur āñkhoñ meñ aañsū
tasādum ko baḌhī aatī haiñ raileñ

manzar meñ aur nazar meñ tasādum thā raat bhar
jab bhī uThī nigāheñ darīcha bikhar gayā