Tags-Dard

be-qarārī meñ bhī akasr dard-mandān-e-junūñ
ai fareb-e-ārzū tere sahāre so ga.e

apne dard ko gard samajh kar manzil manzil chhoḌ diyā
ā.īne par dhuul jamī hai ā.īne meñ dekhe kaun

phuul kī rañgat maiñ ne dekhī dard kī rañgat dekhe kaun
pyaar kā giit sunā hai sab ne dhun thī kaisī soche kaun

dil kī vīrān galī ham ne sajā.ī kaise
kyuuñ kiyā dard se ābād nahīñ samjhegā

ham jise dard-āshnā samjhe
umr bhar sūrat-āshnā hī rahā

us kā ġham mere dil meñ hai ab bāñsurī kī tarah
naġhma-e-dard se zaḳhma-e-iḳhtiyār uThā

raat guzre na dard-e-dil Thahre
kuchh to baḌh jaa.e kuchh to ghaT jaa.e

jab masīhā kī ho marzī kaj-adā.ī kījiye
is jagah kyā dard-e-dil kī phir davā.ī kījiye

ye kaun tum se ab kahe
ye roz roz dard ke jo silsile haiñ kam karo

avval avval vahm-e-davā ne lutf-e-sukūñ barbād kiyā
āḳhir āḳhir dard kī daulat ulfat kā in.aam huī

kaun sharīk-e-dard thā ātish-e-sard ke sivā
raakh haqīr thī magar raakh ko mehrbāñ kaho

shāyad abhī kamī sī masīhā.iyoñ meñ hai
jo dard hai vo ruuh kī gahrā.iyoñ meñ hai

paas haiñ vo dil-e-bīmār duā-go hai ajab
dard jaa.e na mirā na hī masīhā jaa.e

ye hijr un ko milā hai unhī kī ḳhvāhish par
ab ahl-e-dard ye jiine kā ehtimām kareñ

nashāt-e-ġham meñ to dard-e-nihāñ talāsh na kar
nashāt-e-ġham kabhī dard-e-nihāñ se ḳhālī hai

vo jo tark-e-rabt kā ahd thā kahīñ TūTne to nahīñ lagā
tire dil ke dard ko dekh kar mire dil meñ dard hai kis liye

milte haiñ bahut yuuñ to jo āġhosh-kushā ho
dil ke liye vo dard kā dhārā nahīñ miltā

chullū meñ ho dard kā dariyā dhyān meñ us ke hoñT
yuuñ bhī ḳhud ko pyāsā rakhnā kitnā mushkil hai

baaqī hai koī saath to bas ek usī kā
pahlū meñ liye phirte haiñ jo dard kisī kā

iisā na vo nabī koī adnā sā aadmī koī
phir bhī salīb-e-dard ko sar pe koī uThā.eñ kyuuñ