Tags-Dard

sab ne rasmī hī hañsī lab pe sajā rakkhī hai
har koī dard meñ Duubā hai ḳhudā ḳhair kare

kuchh aisā ehtirām-e-dard-e-ulfat hai mire dil ko
ḳhamoshī hukmarāñ hai aah o fariyād o fuġhāñ kaisī

hijr kī raat hai pichhle kā samāñ hai 'almās'
dard āhista zarā bād-e-sabā āhista

pahle dukh dard ka.ī dil meñ sambhāle maiñ ne
phir kiyā ḳhud ko tire ġham ke havāle maiñ ne

maiñ sunā.ūñ kis ko ye hāl-e-dil maiñ dikhā.ūñ kis ko ye dard-o-ġham
maiñ huuñ aisī hālat-e-zār meñ ki ḳhud apnā mujh ko gumāñ nahīñ

haq merī mohabbat kā adā kyuuñ nahīñ karte
tum dard to dete ho davā kyuuñ nahīñ karte

dard-e-ġham-e-firāq se āñkheñ haiñ ashk-bār kyā
rone se hogī muḳhtasar zahmat-e-intizār kyā

bahut se kaam kiye haiñ tirī talab meñ magar
ye kār-e-dard zarūrat se kuchh ziyāda kiyā

kuchh nahīñ kah rahī ye raat mujhe
dard se chāhiye najāt mujhe

na muḌ kar bhī be-dard qātil ne dekhā
taḌapte rahe nīm-jāñ kaise kaise

but-e-be-dard kā ġham monis-e-hijrāñ niklā
dard jaanā thā jise ham ne vo darmāñ niklā

hujūm-e-ġham meñ huā thā ye kaun naġhma-sarā
jalī hai tīrgi-e-shām dard ban ke charāġh

dard dil kyā hai khulā aaj tire laḌne par
tujh se itnī thī mohabbat mujhe ma.alūm na thā

dard kī zāt-e-pāk kā hai
go ain nahīñ vale 'asar' huuñ

us kī tashrīh kyā ho ai 'sāhir'
dard-e-be-nām se mohabbat hai

mai-e-gulfām meñ kuchh durd-e-tah-e-jām sahī
vo ḳhushī kaisī ḳhushī jis meñ kamī hai ai dost

aap ko dekh mire zauq-e-fanā ko bhī dekh
ye tirī shīshagarī dard-sarī hai ai dost

us kī ḳhamoshiyoñ meñ nihāñ kitnā shor thā
mujh se sivā vo dard kā ḳhūgar lagā mujhe

jins-e-āsūdgī nahīñ ham paas
dard aur ġham ke kārvāñ haiñ ham

dard jab dil se judā ho jā.egā
sāz-e-hastī be-sadā ho jā.egā