Tags-Dard

kyā pūchhte ho mujh ko mohabbat meñ kyā milā
donoñ-jahāñ kā dard ba-nām-e-ḳhudā milā

sohbat-e-pīr-e-muġhāñ meñ ye khulī azmat-e-ishq
aql bhī durd-e-tah-e-jām huī jaatī hai

kahūñ kyā dard-e-dil kab se baḌhā hai
nigāh-e-lutf tum ne jab se kam kī

mere dil kī ḳhātir to ye fasāna-e-hastī
zaḳhm-e-be-rafū sā hai dard-e-lā-davā sā hai

parcham-e-mohabbat hai jab se mere hāthoñ meñ
dard dil-nashīñ sā hai zaḳhm dil-rubā sā hai

dard bhī haath thaam le zaḳhm bhī bolne lageñ
ya.anī nihāl-e-shāḳh-e-ġham aise hī bā-numū rahe

kis manzil-e-dushvār meñ huuñ ishq kī 'ārif'
un se bhī mire dard kā darmāñ nahīñ hotā

ai dost samajhtā huuñ tirī pursish-e-ġham ko
bātoñ se kabhī dard kā darmāñ nahīñ hotā

kuchh dard ho kuchh soz ho kuchh nuur ho dil meñ
bas ḳhaak kā putlā hī to insāñ nahīñ hotā

dard kī aañch banā detī hai dil ko iksīr
dard se dil hai agar dard nahīñ dil bhī nahīñ

kis zabāñ se ho bayāñ aao gale lag jaao
dil se dil hī sune kuchh dard-e-jigar aaj kī raat

kyā koī ḳhush ho mire sher ko sun ke 'hasrat'
dard-e-dil hai ye nahīñ aish-o-tarab kā ahvāl

mahram-e-rāz nahīñ miltā koī dard hai ye
kyā tabīboñ se kahūñ ishq ke tab kā ahvāl

rañg ye hai ab hamāre ishq kī tāsīr kā
husn ā.īna banā hai dard kī tasvīr kā

vo apnā dard aap sunā.e to baat hai
ham ne kisī kā dard sunānā to hai nahīñ

ḳhū-e-vafā milī dil-e-dard-āshnā milā
kyā rah gayā hai aur jo māñgeñ ḳhudā se ham

yuuñ Dhal gayā hai dard meñ darmāñ kabhī kabhī
naġhme bane haiñ girya-e-pinhāñ kabhī kabhī

kyuuñ aTā huā hai ġhubār meñ ġham-e-zindagī ke fishār meñ
vo jo dard thā tire baḳht meñ so vo ho gayā use bhuul jā

dard kun se kashīd ho ga.e kyā
ḳhvāb shab se ḳharīd ho ga.e kyā

'shakeb'-e-ġham-zada ko dard se hai ab kahāñ fursat
agar kuchh vaqt mil jaa.e to pyāro tum hī aa jaao