Tags-Dard

mire dard-e-nihāñ kā haal mohtāj-e-bayāñ kyuuñ ho
jo lafzoñ kā ho majmūa vo merī dāstāñ kyuuñ ho

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ġhazal ke bhes meñ aa.ī hai aaj mahram-e-dard
suḳhan kī oḌhe hue hai ridā udāsī hai

shadīd dard kī rū hai ravāñ rag-e-jāñ meñ
balā kā rañj hai be-intihā udāsī hai

sab ġhalat kahte the lutf-e-yār ko vaj.h-e-sukūñ
dard-e-dil us ne to 'hasrat' aur duunā kar diyā

yuuñ bhī hotā hai dard kī had meñ
zard āñkhoñ se kuchh namī nikle

in meñ kyā farq hai ab is kā bhī ehsās nahīñ
dard aur dil kā zarā dekhiye yaksāñ honā

tamām-duniyā kā laḳht-e-jigar banā huā thā
vo aadmī jo mirā dard-e-sar banā huā thā

sone kī tarāzū meñ mirā dard na taulo
imdād se ġhairat kā guzārā nahīñ hotā

nāla-o-āh-o-fuġhāñ dard-o-alam soz-o-gudāz
aah kaise kaise 'joshish' apne ġham-ḳhvāroñ meñ the

shahr-e-nafas se vādī-e-jāñ tak saikḌoñ nāzuk rishte haiñ
saañs na rukne paa.e 'aḳhgar' dard na hone paa.e kam

hāl-e-dil-e-bīmār samajh meñ chāragaroñ kī aa.e kam
bechainī ho jaa.e ziyāda dard agar ho jaa.e kam

guzrā jahāñ se maiñ to kahā sun ke yaar ne
qissa gayā fasād gayā dard-e-sar gayā

ab dard meñ vo kaifiyat-e-dard nahīñ hai
aayā huuñ jo us bazm-e-gul-afshāñ se guzar ke

ai dard-e-ishq baat to jab hai ki mere dost
marne ke ba.ad chain na pā.ūñ mazār meñ

'bedam' us yaad ke maiñ sadqe us dard-e-mohabbat ke qurbāñ
jo jiinā bhī dushvār kare aur marnā bhī mushkil kar de

ai dard atā karne vaale tū dard mujhe itnā de de
jo donoñ jahāñ kī vus.at ko ik gosha-e-dāman-e-dil kar de

ham ki the nashsha-e-mahrūmī meñ
ye nayā dard kidhar se niklā