Tags-Dard

kyā kahūñ hālat-e-dil ai 'jarrār'
dard kuchh aur sivā lagtā hai

jo ek daaġh kī sūrat rahā shab-e-ummīd
nujūm-e-dil meñ vahī dard āftāb banā

jo dil meñ dard uThtā hai to 'beḳhud' sher kahtā hai
madad ashkoñ se miltī hai tabī.at ko ravānī meñ

vāqif haiñ tire dard se ai naġhma-e-ulfat
ham ne tujhe har saaz pe gaayā to nahīñ hai

dil kī rag rag meñ ghulī jaa.e halāvat jis kī
haa.e vo dard kī sauġhāt batāne kī nahīñ

ġham ke maare hue qulūb 'nushūr'
dard kī sarhadoñ ko pā na sake

ye ziist hai yā maut samajh meñ nahīñ aatā
ab dard hai aur dard kī taklīf nahīñ hai

ek hālat par zamāne meñ na guzrī ishq kī
dard kī duniyā bhī ab vo dard kī duniyā nahīñ

ḳhud dard ban gayā mirā darmān-e-zindagī
itnā qarīb ho ga.e kuchh dard hī se ham

ḳhūn-e-ushshāq se jaam bharne lage dil sulagne lage daaġh jalne lage
mahfil-e-dard phir rañg par aa ga.ī phir shab-e-ārzū par nikhār aa gayā

unhīñ se qarya-e-jāñ meñ vufūr-e-dard hotā hai
unhīñ nazroñ meñ tāsīr-e-shifā bhī aa hī jaatī hai

dard-o-rāhat vasl-o-furqat ishq ke haiñ rañg-o-rūp
jaate jaate us ne 'zākir' ḳhuub samjhāyā hameñ

uThne meñ dard-e-muttasil huuñ maiñ
gard-bād-e-ġhubār-e-dil huuñ maiñ

us be-ruḳh ne bedardī se rātoñ rātoñ rulvāyā
dard kā had se baḌh jaanā Thahrī jo davā bīmāroñ kī

dard-bhare gītoñ kī maalā japte japte jīvan guzrā
kis ne sunī haiñ kaun sunegā dil kī bāteñ dil ke naale

ḳhud vo aate agar yaqīñ hotā
dard pursish talab nahīñ hotā

parā.e dard meñ hotā nahīñ sharīk koī
ġhamoñ ke bojh ko ḳhud aap Dhonā paḌtā hai

dard jab se dil-nashīñ hai ishq hai
is makāñ meñ kuchh nahīñ hai ishq hai

dil kā saarā dard bharā tasvīroñ meñ
ek musavvir naqsh huā tasvīroñ meñ

ki jis ke dard kā ehsās tere jaisā ho
kabhī kabhī mirī fitrat ko aisā ghaav bhī de